Nanuktok sa kasaysayan
CEBU, Philippines - Mipaduol na og maayo ngadto sa kasaysayan ang All-Star guard sa Oklahoma City Thunder nga si Russell Westbrook human mitala sa ika-39 niyang triple-double karon nga season, apan dili kini igo aron ilang mapukan ang San Antonio Spurs.
Kini gumikan kay ang Spurs madasigon nga mibangon human malubong og 21 puntos sa ikatulong kuwarter dayon na sa pagpakurat sa Thunder, 100-95 sa NBA kagahapon didto sa Chesapeake Energy Arena sa Oklahoma.
Si Kawhi Leonard mipupo og 20 sa iyang 28 puntos sa second half uban ang 10 rebounds aron pangulohan ang impresibong pagbalitok sa Spurs.
Nagkagidlay ang agi ni Westbrook sa nanghinapos nga bahin sa duwa, apan bisan pa man niini nakamaneho gihapon siya pagtali og 32 puntos, 15 ka rebounds ug 12 ka assists. Duha na lang ang iyang gikinahanglan aron tablahon ang NBA record nga 41 ka triple doubles nga nahimo ni Oscar Robertson niadtong 1961-1962 season.
Mismo si Robertson ang miabiba ni Westbrook aron buk-on ang iyang rekord.
“I always thought he was a great basketball player,” matud pa ni Robertson ngadto sa ESPN.com. “I think he’s been tremendous for the team, his fans and also for television.”
Cavs, Warriors Daog Sab
Sa laing mga aksiyon, nagmadaugon sab ang managkaribal nga Cleveland Cavaliers ug Golden State Warriors.
Ang Cavaliers milatigo sa Philadelphia 76ers, 112-105 aron pagpakgang sa tulo nila ka sagunson nga pilde, apan padayon gihapon silang nagsunod sa Boston Celtics sa liderato sa Eastern Conference.
Si LeBron James maoy nangu sa Cavs uban sa iyang 34 puntos, samtang sila si Kyrie Irving ug Kevin Love nagkumboya’g 42 puntos sa Cavs nga kapito lamang midaog sa 17 ka duwa sa bulan sa Marso.
Samtang ang Warriors milusad og 12-0 run sa katapusang kuwarter aron pagpahagsa sa Houstons Rockets, 107-98 alang sa ika-10 nilang sunod-sunod nga daog. Wala nila paiskora ang Rockets halos sa katapusang siyete minutos sa duwa aron pagkulit sa ikaduha nilang daog batok sa Houston sud lamang sa upat ka adlaw.
Si Stephen Curry mipabuhagay og 24 puntos ug si Klay Thompson dunay 20 puntos ug walo ka rebounds sa Warriors nga nakapasol og 49 puntos gikan sa ilang reserve players. (BANAT NEWS)
- Latest