Cray sasabak sa final tryout
MANILA, Philippines - Magbabakbakan ang pinakamahuhusay na tracksters sa bansa sa 2017 National Open Invitational Athletics Championships ngayon sa Ilagan City Sports Complex sa Ilagan, Isabela.
Ang torneo ang magsisilbing final tryout ng Philippine Athletics Track and Field Association (PATAFA) upang makapili ng mga ipadadala sa 2017 Southeast Asian Games na idaraos sa Agosto sa Kuala Lumpur, Malaysia.
May kabuuang 78 gintong medalya ang paglalabanan kabilang ang 17 sa opening day.
Dumating sa bansa si Filipino-American Eric Shauwn Cray upang lumahok sa national team tryout.
Si Cray ang nagkampeon sa men’s 100m at 400m hurldes sa SEA Games nnoong 2015 edisyon sa Singapore.
Nakasentro rin ang atensyon kina SEA Games 3,000m steeplechase king Christopher Ulboc at Mark Harry Diones, bumasag kamakailan ng national rekord sa 400m at triple jump, gayundin si Filipino-Canadian Zion Corrales-Nelson.
Inaabangan din sina dating Asian champion Marestella Torres-Sunang, Archand Christian Bagsit, Edgardo Alejan Jr. at Janry Ubas.
Nanindigan naman si PATAFA president Philip Ella Juico na kinakailangang lumahok ng mga national team members sa National Open upang makakuha ng puwesto sa SEA Games-bound team.
Nanganganib na matanggal sa pambansang koponan sina Fil-Americans Kayla Richardson at Caleb Stuart dahil hindi pa dumarating ang dalawang atleta.
- Latest
