Manugang binoga ng biyenan, dedo
MANILA, Philippines - Bulagta ang 45-anyos na guro na sinasabing senglot matapos itong barilin ng kaniyang biyenang lalaki sa labas sa Barangay Poblacion, bayan ng Kabugao, Apayao kamakalawa.
Napuruhan at idineklarang patay sa Kabugao District Hospital ang biktimang si Jaime Enciso. Pinaghahanap naman ng mga awtoridad ang suspek na si Peter Patayan, 68, may asawa, retiradong kawani ng gobyerno at residente sa nasabing lugar.
Sa ulat ng Cordillera police na naisumite sa Camp Crame, nakainom ng alak ang biktima nang dumating sa bahay ng biyenan upang sunduin ang kaniyang misis dahil bibiyahe na sila patungong bayan ng Luna, Apayao.
Gayunman, pinukol ng bato ng biktima ang bahay ng biyenan dahil sa matinding pagkairita para lumabas ang kaniyang misis na ayaw pang umalis dahil inaantok pa ito.
Kaagad namang lumabas ang biyanang lalaki dahil sa pag-iingay ng biktima kung saan sumiklab ang pagtatalo hanggang sa maganap ang pamamaril.
Narekober sa crime scene ang basyo ng bala ng cal. 45 pistol.
- Latest