Shaq gihimoan og estatuwa

CEBU, Philippines - Si NBA Hall of Famer Shaquille O’Neal gipasidunggan sa pipila ka mga banggiitang magduduwa sa Los Angeles Lakers dungan sa pagpabarog sa higante niyang estatuwa diin siya mihansak sa bola didto sa Staples Center.

Sila si Lakers legend Kareem Abdul-Jabaar ug Jerry West nga maoy mibira ni O’Neal sa Los Angeles, ang kanhi teammate niyang si Kobe Bryant ug coach Phil Jackson, maoy miyukbo ni O’Neal sa dihang ang bronse niyang estatuwa nga dunay gitas-on nga siyam ka tiil ug gibug-aton nga 544 ka kilo pormal nga giablihan sa mata sa publiko didto sa Star Plaza.

“This moment is very unexpected,” matud pa ni O’Neal nga daw sa dili masabtan ang gibating kalipay. “I definitely appreciate this honor very much.”

Gumikan niini, si O’Neal nakigduyog nilang West, Abdul-Jabbar ug Earvin ‘Magic’ Johnson, NHL icon Wayne Gretzky, boxing superstar Oscar De La Hoya ug broadcaster Chick Hearn sa mga listahan sa mga inilang personalidad nga gihatagan og susamang pagtamod didto sa Los Angeles arena.

“Some thought the odds of Kobe showing up today were the same as Shaq sinking a free-throw,” sumala pang Abdul-Jabaar nga maora’g milabtik sa nahitabong panagbangi sa duha nga miresulta ngadto sa paglayas ni O’Neal sa Lakers niadtong 2004.

Apan si Kobe napuno sa pagdayeg ni Shaq nga maoy miabag kaniya paghatod sa Lakers og NBA grandslam niadtong 2000-2002.

“He’s the most dominating player I’ve ever seen,” matud pa ni Kobe agi’g pagsaludo ni Shaq.

“He’s such a fun, outgoing guy.”

Si Shaq mapasalamaton sa matam-is nga pulong nga gidalit kaniya ni Kobe. “Brother, thank you,” batbat pang Shaq. “We pushed each other, you know, we had our battles, we had our times. But we always had respect for each other and we were  able to win three championships,   definitely couldn’t have done it without you.” (BANAT NEWS)