‘Paano iiwas sa road rage’
HINDI pa man opisyal na idineklarang summer, ang dami ng naitalang insidente ng road rage sa bansa ngayon taon.
Ito ’yung bayolenteng reaksiyon ng mga motorista tulad ng pagmumura, pangungutya, pananakit at madugong komprontasyon.
Dala nang mainit na panahon at mataas na temperatura, maraming motorista ang madaling uminit ang ulo at mas maikli ang pasensiya.
Kunsabagay, sino ba naman ang hindi mabubuwisit umaga palang mistulang mahabang parking lot na ang mga pangunahing lansangan.
Kaliwa’t kanan pa ang mga bastos at walang disiplinang motorista. Hindi ginagalang ang batas-trapiko. Walang respeto sa kapwa nila motorista.
Akala yata nila isang karapatan ang pagmamaneho sa kalsada. Mali.
Ang pagmamaneho ay isang prebilehiyong ipinagkaloob ng estado. Puwede itong bawiin ng gobyerno anumang oras.
Kaya sa mga nasa likod ng manibela, habaan ang pisi. Huwag mahulog sa patibong ng road rage.
Ilan sa mga sanhi kung bakit nagiging road rager ang isang motorista ang problema sa pamilya, problemang-pinansyal, emosyunal, problema sa trabaho at pinagtatrabahuhan o ’di naman kaya kulang sa sapat na pahinga.
Tatlo lang ang magiging kahihinatnan ng isang bayolente at siga sa lansangan. Kung hindi bilangguan, pagamutan, libingan.
* * *a
Abangan ang BITAG Live araw-araw na sabay na napapanood at napapakinggan tuwing alas 10:00-11:00 ng umaga sa Radyo5 92.3 News FM at AksyonTV. Para sa iba pang mga palabas, mag-subscribe sa BITAG OFFICIAL YouTube channel.
- Latest
