12 Pushers Dakpan, 2 Napusilan

CEBU, Philippines - Nadakpan sa kapolisan ang 12 ka suspetsadong pusher, ug duha kanila ang naangol human nga napusilan, ug dul-an sa P2 milyones nga kantidad sa shabu ang nasakmit sa buwag nga anti-drugs operation didto sa Moalboal ug sa dakbayan sa Lapu-Lapu.

Sila si Jemjem Longcob, 18, ug Jessie Carticiano, 35, napusilan sa ilang tiil kay misuway unta kini pagsukol dihang nakabantay nga gi-subject sila og buy-bust operation. Ang ilang kauban nga si Marvin Gabales, 27, nisuway’g ikyas apan nadakpan.

Mga polis sa Moalboal nakig-alayon sa mga sakop sa Provincial Public Safety Company 2nd maneuver platoon ug sa 3rd division sa Philippine Army sa pagpahigayon nila og buy-bust operation sa Barangay Tomonoy kaniadtong miaging gabii.

Si Moalboal Police chief Jose Rovic Villarin miingon nga bag-o pa nga namaligya og drugas ang grupo ni Longcob ug konektado sila sa grupo ni Christian Aquino, ang notadong drug personality sa Moalboal nga padayong nagtago-tago.

Matud ni Villarin nga naniguro sila pagpakuyog og taga PPSC ug Army kay nadungog na nga manukol ang mga drug pusher sa Tomonoy. Gani duha ka polis ang napatay sa mga drug pushers kaniadtong 2014.

Human napalitan og shabu si Carticiano, mihamag dayon ang grupo sa mga polis. Ang asset misinggit nga armado ang usa ka pusher mao nga kini napusilan. Si Carticiano nakuhaan og 38 kalibre nga revolver. Niabot og 96 gramos nga shabu, kantidad og P1.1 million ang nakuha gikan sa tulo.

Lapu-lapu city

Sa laing buy-bust operation, ang mga sakop sa City Drug Enforcement Unit (CDEU) ug City Intelligence Branch (CIB) sa Lapu-Lapu City Police Office misikop og walo ka suspetsadong pushers nga ilang nasakmitan og P800 mil nga shabu.

Mga polis nga gipangulohan nila ni Senior Inspector Joey Bicoy ug Chief Inspector Mark Gifter Sucalit nagpahigayon og buy- bust operation sa Barangay Pajac kaniadtong Martes sa buntag.

Ang giingong high-value target nga si Romwel Tagalog, taga Liloan, nadakpan sa grupo nila ni Bicoy ug nasakmitan og 12 ka medium-sized nga paketeng shabu (61 gramos) nga mokantidad og P719 mil.

Ang ubang dinakpan sa mao nga pagpangronda mao sila si John Paul Cabije, 22, Joseph Inot, 29, Nicanor Fulvera, 32, parehong taga Pasil, Dakbayan sa Sugbo. Nasakmitan sila og 58 ka paketeng shabu (2.95  gramos) nga kantidad og P34 mil.

Nasakmitan usab sila og P2 mil nga gituohang halin sa drugas ug ang P300 nga buy-bust money.

Sa laing buy-bust operation sa mao gihapong barangay, nadakpan usab sa kapolisan sila si Christopher Dacay, 28, ug Rolito Flores, 27, taga Barangay Gun-ob ug nakuhaan sila og siyam ka gagmay nga paketeng shabu.

Laing anti-drugs operation gihimo didto sa Barangay Basak, Dakbayan sa Lapu-Lapu nga misikop nila ni Jepulito Degamo, 47, Josedin Sabejon, taga Gun-ob sa maong dakbayan.

Sa Consolacion, nadakpan usab si Rugiel Bacala, 31 didto sa Barangay Lamac ug nasakmitan sa kapolisan og pinaketeng shabu. Jojo C. Ugdol ug Romeo T. Limpangog (BANAT NEWS)