Tiket sa World C’ship premyo sa CT Ironman 70.3
MANILA, Philippines - Premyong $15,000 at 30 tiket para sa Ironman 70.3 World Championship ang nakataya sa Century Tuna Ironman 70.3 sa Linggo sa Subic Bay.
Papagitna ang mga nangungunang triathletes sa event na inihahandog ng Century Bangus, Department of Tourism at Tourism Promotions Board.
Magsisimula ang nasabing three-day weekend ngayong araw sa pamamagitan ng 2GO Bike Service and Expo, habang pakakawalan bukas ang Alaska Ironkids at ang popular na Century Tuna Superbods: The Underpants Run.
Nasa bansa na ang mga nagdedepensang sina Craig Alexander ng Australia at Swiss Caroline Steffen at inaasahang masusukatan ng kanilang mga karibal sa 1.9km swim, 90km bike at 21km run event na inorganisa ng Sunrise Events, Inc.
Bukod sa premyong $3,000 ay maghahangad din ng tiket ang mga triathletes para sa World Championship na nakatakda sa Setyembre sa Chattanooga, Tennessee kung saan nila makakasama ang mga top finishers mula sa ibang Ironman elims sa Australia, Germany, South Africa at Switzerland.
Humigit-kumulang sa 1,000 entries ang lalahok na sumapaw sa 902 noong 2015 at 823 noong 2016.
- Latest