Pagtulon-ang gipatik sa libro

“Malipayon, gaan sa pamati ug walay kakulian. Kini ang paghulagway ni Candice Grace Cabras Maque dihang iyang gibalik lantaw dinhi sa Banat News Tingusbawan ang panahon dihang iya pang gisabak ang iyang ikaduha nga anak nga si JJ o si Jerry II.”

Kun unsa ka gaan ug kahamugaway ang iyang gibati dihang anaa pa sa iyang sabakan si JJ, nataud-tauran pa una pa niya kini nabati pag-usab.

Hinay-hinay kining mibalik samtang iyang gipadako ang bata nga mo-edad na karong tuiga og 7 anyos.

Usa ka espesyal nga inahan si Candice, kinsa usa ka public school teacher sa dakbayan sa Talisay. Graduwado siya sa kursong Mass Communication sa Saint Teresa’s College apan mas iyang gipili ang maong propesyon human sa pipila ka tuig nga nanarbaho sa dagkong kompaniya.

Espesyal si Candice gumikan sa iyang espesyal nga anak nga si JJ, ang ikaduha sa tulo niya ka mga anak. Iyang gibutyag nga usa ka semana sukad niya gi-anak ang bata, una pa niya nahibaw-an nga aduna diay kini Down syndrome.

Nadugay ang maong pagdiskubre gumikan sa congenital pneumonia nga giantos sa bata human kini gipakatawo.

Iyang giangkon nga nag-wild siya sulod mismo sa nursery sa ospital gumikan sa iyang nadiskubrehan kay dili niya madawat ang iyang anak. Ang bata nga wala niya gipangandoy.

Apan iyang gibutyag nga nausab ang ilang kinabuhi sa iyang bana nga si Jerry sa pag-abot ni JJ. Kini gumikan sa nagkadaiyang kasinatian samtang iya kining gipadako. Kini sama sa pagka-ospital na sab niini dihang pito ka buwan pa lang kini gumikan gihapon sa pneumonia.

Dinhi, inanay niyang nadiskubrehan ang mga pagtulon-an sa kinabuhi. Gani alang niya, si JJ ang nahimo pa niyang maestro gumikan sa nagkalain-laing pagtulon-an nga gitudlo niini ngadto kaniya pinaagi sa mga simple nga lihok ug gimbuhaton sa bata matag adlaw. Dinhi subling giusab ni JJ ang iyang kinabuhi.

“For the past years, I have come to realize that after all, JJ is not just my son, he is my teacher as well. While I am a teacher myself, there is no greater honor than to be his mother,” tipik sa libro ni Candice.

Bisan tuod og nadawat na nila sa iyang bana ang bata, mas sakit alang nila ang mga pagsaway sa ubang tawo nga wala makasabot sa situwasyon ug sa mga tawong adunay kondisyon sama ni JJ.

Gani nahimo siyang advocate runner isip iyang plataporma pag-edukar sa katawhan kabahin sa maong kondisyon. Gihulagway niini nga ang mga batang adunay Down syndrome mahimong mabuhi sama sa usa ka normal nga tawo, hinuon hatagan lang sila og konsiderasyon ug igong panahon aron sila makaapas sa naandang dagan sa katilingban.

Dili ra dinhi kutob ang iyang adbokasiya, nakahuna-huna siya nga ipang-post sa Facebook ang iyang mga nakat-onan gikan kang JJ aron masabwag ug mapaambit ngadto sa iyang mga kaila.

Gikan sa mga simpleng hitabo, aduna siya’y mga naamguhan bahin sa kinabuhi.

Wala siya magdahum nga makakuha kini’g atensyon sa iyang bag-ong higala nga si Jonathan Dungog kinsa iyang nakaila sa usa ka running event. Gitanyagan siya nga himuong libro ang iyang mga posts. Tuod man, wala siya magduha-duha sa paglangkat sa maong kahigayonan human siya pasaligi ni Jonathan nga kini na maoy bahala.

Buwan ang giihap hangtud nga niadtong Enero 17, 2017, na-publish ang labing unang libro ni Candice nga giulohan og “Life with JJ: Lessons from a Special Mom” pinaagi sa Author House, usa ka publishing company nga nagbasi sa United Kingdom. Napatik sa maong libro  ang 50 niya ka pagtulon-an.

“My imperfect journey together with my son brought a lot of perfect memories to every person we meet and to any event we encounter.  We discovered together that there are angels in human form, that there are blessings hidden in the most difficult situation we are in,” tipik gihapon sa libro.

Pormal nga gilusad dinhi sa Sugbo ang iyang libro atol sa kasaulogan sa Happy Walk 2017, Pebrero 19, ang kalihukan tumong sa Down syndrome awareness.

Daghan ang nipasalig nga mopalit sa maong libro diin nagkantidad kini’g P400. Sa matag libro nga mahalin, P50 niini igahin niya alang sa Down Syndrome Association of the Philippines diin sakop siya niini. Samtang ang mahabilin, iyang igasto alang sa therapy ni JJ kinsa nagtungha karon sa usa ka normal nga tunghaan.

Giangkon ni Candice nga wala siya magdahom nga makabaton og kaugalingong libro nga siya mismo ang nagsuwat kay bisan tuod nga gradwado siya og Masscom, dili siya bilib sa iyang sinuwatan.

Apan karon, nakahimo siya niini gumikan sa iyang anak kinsa iyang gihulagway sa iyang libro nga espesyal nga gasa gikan sa Kahitas-an.

Wala dinhi matapos ang kalbaryo ni Candice kay sa dul-an 200 ka libro niya, gatuo siya nga sobra sa katunga niini mahalin na, apan diay wala na siya sanunga sa mga misaad nga mopalit sa iyang mga libro.

Mao nga nagdoble kayod siya aron mahalin kini kay unsaon na lang ang iyang gisaad ngadto sa organisasyon sa Down syndrome. Hinuon, wala siya mapakyas kay wala maabti og buwan, nahurot gyud ang iyang libro.

Nalipay siya niini ug matud niya nga kapin sa 50 porsiyento nga nipalit sa maong libro dili mga special parent o adunay mga kabanay nga adunay espesyal nga kondisyon.

Wala pay plano si Candice nga sundan ang maong libro sanglit matawag nga accidental masterpiece ang mao niyang namugna human siya makakuha’g inspirasyon sa iyang espesyal nga anak.

Buot lang niyang ipakuyanap ngadto sa tanan ilabi na niadtong makabaton unya og espesyal nga bata nga unta dawaton kini nila sa tibuok nilang kasing-kasing. Naghinaut usab siya nga sama niya, nga unta makasabot ug dawaton sa tanan ang mga kalainan sa isig kaingon.

Alang niya, ang pagbaton og usa ka espesyal nga anak, kasinatian nga dili mabayran ug wala nay makalabaw pa.