Pag-antos

Nag-jogging si Vice Mayor Edgardo Labella sa IT Park kaniadtong Sabado sa buntag ug naagian niya ang  usa ka magtiayon uban sa mga lima ka gagmay niining anak nga diha ra nangatulog sa aseras.

Naikag sa paghunong ang bise mayor ug iyang gipangutana nganong diha ra sila mangatulog. Nahibaw-an ni Labella nga ang mao diay’ng pamilya walay balay dinhi sa dakbayan kay gikan pa kini sa Bohol.

Mianhi sa Sugbo ang amahan kay manimpalad pinaagi sa pagpangita og trabaho, apan gidala ang iyang asawa ug lima ka gagmay pa gyud nga anak. Hapit na man gyud unta ang pagsira sa klase apan gipaundang ra gyud niya ang mga bata sa pagtungha.

Pastilan, sayopa nga hukom sa maong amahan. Napugos si Labella pagkuot sa iyang pitaka ug gihatagan og kuwarta ang amahan, dayon gipahatod kini sa pier aron mopauli sa Bohol.

Maayo lang kun wala pa ibaligya ang ilang balay kay mao ra ba kini ang sagad buhaton sa uban nga kun molarga gani, ibaligya ang kahayopan ug apil pa ang ilang balay.

* * *

Dili sayon ang pagpangita’g trabaho kun wala ka pa’y ideya niini. Karon hinuon, makaingon na lang ko nga sayon ra man diay kun abtik ka ug kugihan, ikaduha maayo ka nga mosulti, kay daghang radio station nangita’g reporter.

Bitaw, kaniadto pait sab ang akong naagian. Paturagas ra ko og apply basta dili lang gyud ma-standby kay aron dili mahutdan sa gamay kaayo nako nga bawon gikan sa among probinsya.

Giaplayan gud nako ang usa ka “Tin Shop” diha sa Taboan, kana ba’ng buhatanan sa mga balde. Dili tingali mo motuo nga sa unang adlaw pa lang, nakahuman dayon ko og 10 ka balde.

Wala hinuon ko magdugay kay dili man makasapar ang sweldo nako, kay pakyaw man ug kinahanglan ko nga makahuman og 60 ka balde sa usa ka adlaw aron dako og kita.

Mao kadto nga mi-training ko pagka guwardiya ug nakasulod, diha ko madestino sa dakong department store atbang sa UV. Kay dili man maayo mosweldo ang among ahensiya, miundang ko.

Nakahuna-huna ko nga motikang sa ang-ang, miaplay ko pagka drama talent sa usa ka sibyaanan, apan sa ngadto-ngadto giingnan ko sa manager nga mag-reporter kay maayo kuno ko mosulti. Char, hahaha.

Gipakuha ko og examination sa manager, pagbuhat og news ug pag-report, uban sa mga daan na nga reporters. Kalooy sa Ginoo, duha ra mi nga “Junior Vigilante” kaniadto nga nipasar. Aw dawat dayon.

Ingon niana ang kalisod sa pagpangita og trabaho basta bag-o ka pa nga moabot sa siyudad.