Mag-asawang Duterte binihag

MANILA, Philippines - Dinukot ng hindi pa nakilalang pitong mga armadong kalalakihan ang mag-asawang Duterte na ka-apelyido ni Pa­ngulong Rodrigo “Digong”  Duterte matapos na puwersahang pasukin ang tahanan ng mga ito sa Brgy. Sta Maria, Siocon, Zamboanga del Norte nitong Biyernes ng gabi.

 Ayon sa mga opis­yal ng militar at pulisya, kasalukuyan pa nilang inaalam kung kamaganak ni Pangulong Rodrigo Duterte ang mag-asa­wa­ng biktima na hindi naman umano mayaman at karaniwan lamang ang pamumuhay.

Kinilala ang mga biktima na sina Jose Duterte, 62 anyos at misis nitong si Jessica Barazon Duterte, 52 taong gulang, residente ng nabanggit na lugar na may pag-aaring niyugan.

Base sa report , sinabi ni AFP - Public Affairs Office (AFP-PAO) Chief Col. Edgard Arevalo, nangyari ang pagdukot sa mag-asawang Duterte sa loob ng tahanan ng mga ito sa nasabing lugar bandang alas-8 ng gabi.

Sa imbestigasyon, kasalukuyan nang nagpapahinga ang mag-asawa sa kanilang tahanan nang bigla na lamang pasukin ng limang mga armadong kalalakihan  habang dalawa pa ang nagsilbing lookout sa labas.

Walang nagawa ang mag-asawa matapos na kaladkarin ng mga kidnappers pasakay sa naghihintay ng mga itong bangka sa may dalampasigan saka tumahak patungo sa hindi pa mabatid ng destinasyon.

Nagsasagawa na ng search and rescue o­perations  ang pinagsanib  na elemento ng pulisya at Army’s 13^th Special Forces upang buhay na masagip ang mag-asawa at maaresto ang mga suspek. Iniimbestigahan na ng mga awtoridad ang kasong ito upang matukoy ang grupong nasa likod ng pagbihag sa mag-asawa.