Stage 14 inangkin pa rin ni Morales

ILOILO CITY, Philippines – Kagaya ng inaasahan, naging coronation ride para kay Jan Paul Morales ng Navy-Standard Insurance ang Stage 14 ng 2017 LBC Ronda Pilipinas.

Kasabay ng pag-angkin sa nasabing 50-kilometer Stage 14 criterium ay sinikwat din ni Morales ang kanyang ikalawang sunod na korona kahapon dito sa Iloilo Business Park.

“Iyong pinaghirapan namin, nagbunga at hindi nasayang 'yung suporta ng sponsor namin,” sabi ng tubong Calumpang, Marikina na nagposte ng kabuuang oras na 44:55:35 sa overall individual classification.

Inangkin ni Morales ang premyong P1 milyon sa 14-stage race na inihandog ng presentor na LBC katuwang ang MVP Sports Foundation, Petron, Mitsubishi, Versa.ph, Victory Liner, Maynilad, Standard Insurance.

Inungusan ni Morales ang kapwa Navyman niyang si Rudy Roque (45:09:20) at sina Cris Joven (45:12:16) ng Kinetix Lab-Army, Bryant Sepnio (45:23:37) ng Go For Gold, Leonel Dimaano (45:23:51) ng RC Cola-NCR, Ronald Lomotos (45:24:41), Da­niel Ven Carino (45:27:35) at Lloyd Lucien Reynante (45:28:33) ng Navy, Reynaldo Navarro (45:31:11) at Ronnilan Quita (45:32:25) ng Army.

Si Morales ang ikalawang rider na nagkampeon ng dalawang beses sa LBC Ronda Pilipinas matapos si Santy Barnachea noong 2011 at 2015.

Nagsumite naman ang 31-anyos na si Morales ng 1:05:08 para pagharian ang 50-kilometer Stage 14 criterium para sa kanyang ika-anim na lap victory.

Ipinakita din ng mga Navymen ang kanilang dominasyon sa overall  best young rider at overall team classification.

Naglista ang 17-anyos na si Carino ng Mangaldan ng Pangasinan ng 45:27:35 para kilalanin bilang Best Young Rider, habang humakot ang Navy ng 176:46:09 para sa team overall title kasunod ang Army (177:36:36) at  Go For  Gold (177:46:07).