iTax system sa probinsiya wa pa kahunat

CEBU, Philippines - Nagplano ang kagamhanan sa Probinsiya sa Sugbo sa pagkonektar sa internet sa iTax sa kalungsuran aron sayon kaayo ang ilang pag-access sa mga records.

Si Provincial Treasurer Emmanuel Guial nagkanayon nga 10 na lang ka lungsod ang wala naggamit og iTax.

Ang probinsiya gilangkuban sa 44 ka lungsod ug pito ka component cities.

Gibutyag ni Guial nga niining tuiga gikatakdang ang tanang local government units sa probinsiya maggamit na og iTax.

Gipasabot ni Guial nga ang iTax alang lang kini sa Real Property Tax (RPT).

Ang pagkwenta sa RPT ngadto sa kalungsuran dali na kaayo tungod sa maong iTax program itandi sa mano-mano kaniadto.

Gawas niini, kung dunay records nga gustong kuhaon dali kaayo kining makuha ug pwede kining mapadala pinaagi sa email.

Tungod sa iTax sayon na kaayong makuha ang gidaghanon sa delinquent tax payer sa RPT.

Matud ni Guial nga kung pangayoan usab siya og datos sa mga delinquent tax payer dali na kaayo siyang makahatag tungod kay mapasa man dayon sa lungsod pinaagi sa email ang impormasyon.

Niadtong 2011 ang kagamhanan sa probinsiya dunay kontrata tali sa usa ka German company sa iTax program diin ang probinsiya nigahin og P11 milyones nga budget alang sa procurement sa software. Gibutyag ni Guial nga ang progress sa maong programa hinay kaayo tungod kay dili accepted sa kalungsuran.

Matud ni Guial nga nagsige sila og promote niini ug gipaubos sa training ang mga personnel sa kalungsuran. (BANAT NEWS)