Kapitolyo mo-apply balik sa LBP
CEBU, Philippines - Subli nga ni-apply ang kagamhanan sa Probinsiya sa Sugbo og loan sa Land Bank of the Philippines human ni-expire na ang tagal sa una nilang application sa P200 milyones alang sa pagpalit og mga heavy equipment.
Si Provincial Treasurer Emmanuel Guial nibutyag nga Hulyo 14, 2016 ni-expire ang usa ka tuig nilang loan application sa Monetary Board Opinion (MPO) ug gihatagan sila og unom ka buwan nga lugway nga napupos niadtong Enero 14, 2017.
Matud ni Guial nga Enero 12, 2017 naaprobahan sa Bureau of Local Government Finance (BLGF) ang ilang application ug gihatagan na usab sila og bag-ong “net borrowing capacity” diin nalatid kung pila ang pwedeng mautang sa probinsiya.
Ang certification sa BLGF ipauban sa loan application ngadto sa (MBO).
Gibutyag ni Guial nga kung ang application mapadala na ngadto sa MBO posibleng walay duha ka buwan maaprobahan na kini.
Dugang ni Guial nga sulod sa lima ka tuig impason sa probinsiya ang loan diin magbayad sila og tubo niini nga 3.75 porsiyento matag tuig.
Ang planong pagpapalit og heavy equipment sa probinsiya nahimong kontrobersiyal hinungdan nga nahitabo ang ikaduhang bidding.
Adunay reklamo nga gisang-at sa buhatan sa Ombudsman batok ni Gobernador Hilario Davide III, Bise Gob. Agnes Magpale, walo ka sakop sa hunta probinsiyal ug mga sakop sa Bids and Awards Committee.
Ang ConEquip/RDAK joint ventures ang nidaug sa bidding sa kantidad nga P227.4 milyones. (BANAT NEWS)
- Latest
