Impostor tiklo sa extortion kay Gov. Mangudadatu
MANILA, Philippines - Bagsak kalaboso ang isang inhinyero na nagpakilalang miyembro ng volunteer Task Force ng Office of the Solicitor General (OSG) matapos na ireklamo ng pangongotong ng P300,000 kapalit umano ng paglilinis sa pangalan ni Maguindanao Gov. Esmael “Toto” Mangudadatu sa entrapment operation sa lungsod ng Maynila.
Sa ulat ni NBI-Special task Force chief, Moises Tamayo, ang suspek na si Engr.Ali “Saydee” Mustapha, na nagpakilalang miyembro ng Special Task Force Crusade Volunteer at batay sa hawak na pekeng dokumento ay accredited ang kanilang grupo ng OSG subalit pirmado umano ni ret. Colonel Romeo Maganto.
Sa naging paghayag ni Mangudadatu sa media, sinabi niya na noong Pebrero 12, 2017 ay nagpadala ng text messages ang suspect na nagsasabing ang grupo niyang Task Force Crusade ay nag-iimbestiga sa mga tiwaling opisyal ng pamahalaan.
Tinawagan din umano siya ng suspek na nagsabing kabilang siya sa mga drug personalities na nasa listahan ni Pangulong Rodrigo Duterte at kung nais nitong malinis ang pangalan ay kaya umano niyang ‘dukutin’ ang rekord upang matanggal siya sa drug list pero kapalit nito ay kailangang magbayad ng P 300,000.00.
Agad namang nakipag-ugnayan sa NBI si Gov. Mangudadatu at nasakote kamakalawa ng hapon sa entrapment operation sa isang restaurant sa Ermita, Maynila.
Sa beripikasyon, sinabi ng NBI na walang awtorisasyon o itinalagang task force ang OSG para mag-imbestiga at mangotong. Nahaharap ngayon sa kasong robbery extortion ang suspect.
- Latest