Bag-ong album ni Glaiza nahulma na

CEBU, Philippines - Malipayong gipahibalo ni Glaiza de Castro nga nahulma na ang iyang bag-ong album  nga gilangkoban og nagkadaiyang revival songs.

Nasayran nga duha ka tuig na ang nilabay ang katapusang pag-release sa unang album ni Glaiza nga Synthesis.

“This time, may revivals ako, at lahat 'yun ay OPM. Nag-focus ako sa Tagalog songs. Lahat ng eight songs, Tagalog,” suma pa niya.

Posibleng i-release ang bag-o niya nga album karong summer ug nagpanikad na og maayo si Glaiza niini.

Concert for A Cause sa Basilica

Ilusad karong gabii  pinaagi sa usa ka concert  diha sa  pilgrim center sa  Basilica Minore del Santo Niño ang bag-ong album ni Fr. Vic Amplayo OSA nga nag-ulohan og  “Continuing The Legacy … In Deum”.

Suma pa ni Fr. Vic nga namugna kini isip halad sa Kahitas-an ug gilangkoban kini og nagkadaiyang inspirational songs.

“Collection gyud sa inspirational songs ug sure ko ganahan gyud sila sa mga sulod sa album. Pinaagi usab sa songs, daghan pud sila makuha nga lessons ,” suma pa ni Fr. Vic.

Matud pa niya nga matag usa ka CD album nga nagkantidad og P250, aduna na kini pakapin nga lima ka tickets unyang gabii.

“Kung dili mopalit sa album, puwede ra ticket ang ilang paliton tag-P50 ang usa.

Maisip usab kini nga espesyal nga selebrasyon gumikan kay naatol usab kini sa birthday sa kauban ni Fr. Vic nga  paring Agustino nga si Fr. Victor Gonza OSA.

Modalit usab  og espesyal nga song numbers karong gabii ang pipila ka staff,  magtutudlo, ug  estudyante sa  Colegio del Santo Niño.

“Ipakita gyud nila sa katawhan ang tinagoan nila nga talento , malingaw gyud ang mga tawo niini, “ suma pa ni Fr. Vic kinsa  kasamtangan usab nga school director.

Giatngan usab karong gabii ang performance ni Fr. Jonas Mejares OSA  ug singer  nga nagbase sa laing nasud nga si Kirby Asunto.

Modalit usab og hugyaw nga song number ang laing performer nga si Julie Anne Uy ug uban pa nga dinapit nga singers.

Ang kita  sa maong concert ihapak sa dugang galastoon sa padayon nga pagpatukod sa kapilya ug eskwelahan nga nahimutang sa Greenhills San Fernando, diin adunay napanag-iya nga luna ang Augustinian community.

Padayon ang ilang pagpangalagad sa katawhan bisan pa man sa  mga tawo nga naa sa layong dapit.

Nasayran nga nagmalampuson ang labing una nga fiesta  sa maong dapit dili pa lang dugay. (BANAT NEWS)