200 ‘scalawag cops’ na umalma sa Basilan deployment, sisibakin

MANILA, Philippines - Mahigit 200 police scalawags na pumalag sa pagpapatapon sa kanila sa Basilan para isabak sa mga bandidong Abu Sayyaf Group ang namemeligrong mapatalsik sa serbisyo ng Philippine National Police (PNP).

Ito ang sinabi ni  PNP-Directorate for Investigation and Detective Ma­nagement (DIDM) Chief P/ Director Augusto Marquez Jr., kaya’t binigyan nila ng ultimatum na 10 araw ang mga pasaway na parak para magpaliwanag sa  hindi nila pagsunod sa kautusan  ni PNP Chief P/Director Ronald “Bato” dela Rosa na mapadala  sa Basilan.

Magugunita na noong  Martes ay tanging 53 sa mga rouge cops ang sumipot sa Villamor Air Base sa Pasay City at sumakay sa C130 plane patungong Zamboanga City at mula rito ay inilulan naman ng barko ng Philippine Navy patungong Basilan.

Sa kabuuang 387 rouge cops na nasa talaan ng National Capital Region Police Office (NCRPO), 40 sa mga ito ay hindi na idedeploy dahilan dumadalo ang mga ito sa paglilitis ng kanilang mga kaso at nasa 253 na lamang ang ipinadedeploy sa Basilan matapos na mauna nang mag-AWOL ang iba sa mga ito.