Kiwawan sa Ex
CEBU, Philippines - Walay kahadlok nga giangkon ni Albie Casiño nga dili niya gusto nga makatrabaho si Andi Eigenmann sa usa ka proyekto. Gipadayag niya nga kiwawan siya makauban ang aktres tungod sa isyu nila kaniadto. "Ayokong maging weird sa set eh. I’m not going to pretend that there’s no history at all”, suma pa ni Albie.
Mobalhin ba gyud?
Nagplano na si Martin Escudero nga mobalhin og laing istasyon human natapos ang iyang kontrata sa TV5. Matud pa niya nga naghuwat na lang siya sa tukmang higayon gumikan kay wala pa usab siya’y nadawat nga tanyag sa laing network. Dugang pa niya nga mas ganahan na siya nga mahimong freelance aktor sa TV5 aron pwede ra usab siya modawat og mga proyekto sa laing istasyon.
Birthday concert
Hugyaw ang mahimong selebrasyon sa 18th birthday sa Kapamilya star nga si Loisa Andalio gumikan kay sa unang higayon mopahigayon kini og usa ka konsiyerto. Ang Touted as Loisa 18: A Birthday Concert mahitabo karong Abril 29, 2017 sa Music Museum.
Ninang sa kasal
Gidawat ni Karla Estrada ang hangyo ni Billy Crawford nga mamahimong ninang sa kasal nila ni Coleen Garcia sunod tuig. Ang duha maoy guest sa morning show sa ABS-CBN nga Magandang Buhay kagahapon..
Reunion movie
Gipahibalo ni multimedia star Toni Gonzaga nga aduna siya’y pagahimoon nga pelikula kauban si Piolo Pascual. Si Direk Joyce Bernal maoy direktor sa maong proyekto ug sabutan pa nila kung kanus-a nila sugdan ang shooting. Gipasalig ni Toni nga lahi ang timpla sa ilang istorya kung itandi sa box-office hit nga Starting Over Again.
Pelikula ni Donnalyn
Malipayon ang online sensation nga si Donnalyn Bartolome nga nahuman na gyud ang pelikula nga dugay na niya nga gipangandoy . Emosyonal usab siya gumikan kay gihatagan siya og higayon sa Viva management nga makamugna og kaugalingong konsepto. Gani, siya usab ang nahimong scriptwriter sa maong pelikula. Wala usab siya modetalye kung kanus-a kini ipagawas sa mga sinehan.
Di magpapildi
Nagsagul na karon ang gibati ni Gerald Anderson gumikan kay usa siya sa 25,000 runners nga motigi sa Los Angeles Marathon karong Marso 19. Matud pa sa aktor nga buhaton niya ang tanan aron magmalampuson sa maong kompetisyon. “Ayaw ko magpatalo,lahat gagawin ko”, suma pa ni Gerald.
Kalit-kalit
Gibutyag ni ex-PBB Housemate Jerome Alacre nga dili planado ang iyang pag-angkon kaniadto sa iyang tinuod nga sekswalidad. Suma pa niya nga tumong lang unta gyud niya ang makahibawo sa kadaghanan kung unsa ang istorya sa iyang kinabuhi. Malipayon usab siya gumikan kay nakapahungaw na gyud siya sa iyang dugay ra nga gitagoan sa iyang dughan.
Here lies love
Usa si Mark Bautista sa molugwa sa US Production sa stage musical nga Here Lies Love nga una niya nga gihatagan og kinabuhi didto sa West End, London. Siya ang nidala sa karakter ni Ferdinand Marcos. Makauban niya ang Pinay stage actress nga si Jaygee Macapugay nga maoy modala sa papel isip Imelda Marcos. Mosikad ang maong stage play karong Abril 7 sa Seattle Repertory Theater sa Seattle, Washington.
Nagkuwang
Gipadayag ni Kiko Estrada nga puro sila walay oras sa usa’g usa ni Barbie Forteza mao nga nakahukom sila nga magbuwag. Suma pa ni Kiko nga siya ang mas nagkuwang ngadto kang Barbie gumikan kay wala kaayo niya kini hatagi og igong atensiyon human siya na-busy sa Sinungaling Mong Puso kung diin siya ang usa sa mga bida niini. Dugang pa niya nga girespeto ra niya ang hukom ni Barbie. (BANAT NEWS)
- Latest