Wa diay mag-apura
Sa kataposan, apan human una sa duha ka buwan nga kalangay, giaprobahan na gyod sa Malakanyang ang P1,000 nga uminto sa binuwan nga pension sa Social Security System (SSS). Napatuman ang pasalig sa kadagkoan sa SSS nga ang uminto nagsugod sa Enero karong tuiga.
Sa unang tulo ka Biyernes sa sunod buwan madawat sa mga pensionado sa SSS ang mga uminto sa tulo ka hugna: Ang uminto sa Enero madawat sa Marso 3, ang uminto sa Pebrero madawat sa Marso 10 ug ang uminto sa Marso madawat sa Marso 17.
* * *
Ang pakigbisog alang sa uminto sa pension sa SSS napuno sa kakuwang og pagpakabana alang sa kabos nga mga pensionado, panagbangga sa Malakanyang ug sa Kongreso, makauuwaw nga pamolitika ug taas nga pagpaabot.
Sud sa dugay nang panahon, gipasagdan sa SSS ug Malakanyang ang makamatay nga pension nga di gani paigo alang sa pagkaon ug tambal sa retiradong mga sakop. Sa dihang nakalusot na gyod ang nalangay na pag-ayong uminto sa pension dayong eleksiyon sa niaging tuig, nagbuut-buot ang mga kongresista ug mga senador sa way pagkonsulta sa Malakanyang.
* * *
Si Presidente Rodrigo Duterte igo lang nisakay sa kontrobersiya. Gidasonan niya ang P2,000 nga uminto sa binuwan nga pension sa way pagsusi sa aktuwal nga kahimtang sa panudlanan sa SSS.
Pagbanos niya sa Malakanyang, nanlipaghong sa kauwaw si Duterte dihang gibaraw sa iyang economic managers ang uminto kay, kon ipamugos gyod, seguro nga makapa-bangkarota sa pundo. Maong napugos pag-uyon nga gawas nga anam-anamon ang uminto umintohan pa gyod ang binuwang bayranan sa aktibong mga sakop sa SSS.
* * *
Nikalit lang og gawas gahapon, human sa dul-an duha ka buwan nga pinaabot, ang dokumentong nag-aprobar sa uminto sa P1,000 nga pension sa SSS. Apan pinirmahan lang ni Executive Secretary Medialdea, nalinga gihapon sa lain ug posibleng mas mahinungdanon ug mas dinaliang mga butang si Duterte.
Klarong gihangan ang Malakanyang sa pagbisto sa SSS nga niadto pang Enero silang andam paghatag sa uminto. Apan wa kalihok kay wa pa pirmahi sa Malakanyang ang gikinahanglang mga dokumento. Nabisto nga, sukwahi sa iyang pagarpar, wa diay mag-apura si Duterte pagtabang sa SSS pensioners.
- Latest
