Panglao, Tagbilaran police niprotekta sa suspek?

CEBU, Philippines - Midangop sa Police Regional Office – 7 aron moduso og formal complaint ug assistance ang kliyente ni Atty. Mia Mascariñas-Green, ang abogadang gipatay didto sa Bohol nga si Conrada Blomqvist.

Gitataw ni Blomqvist nga nidangop siya sa buhatan ni PCSupt. Noli Taliño kay padayon gihapong gawasnon ang mga suspek sa pagpatay sa iyang abogada nga sila si Lloyd Gonzaga ug Romarico Benegian. Daku ang iyang pagtuo nga giprotektahan kini sa kapolisan sa Panglao ug Tagbilaran City diin kadaghanan niini higala sa suspetsado.

Sumala pa ni Blomqvist, kapila na siyang suway nga niduol sa maong mga police station aron magpakitabang apan gibaliwala lang siya ug wala hatagi og aksiyon, hinungdan nga niabot sa punto nga nakalas gyud ang iyang abogado.

Dugang niini nga adunay mga higayon nga eskortan pa og polis sa Panglao ang iyang umagad nga si Gonzaga nga maoy nangilog sa iyang mga propiyedad ug nanghulga pa sa iyang kinabuhi.

Gitug-an ni Blomqvist nga buot niyang imbestigahan sa PRO-7 ang iyang reklamo ug andam siyang mohatag og mga ebidensiya.

Isip tag-iya sa Alona Embrace Resort, mangayo usab siya og assistance nga makasulod sa iyang resort kay daghang tawo sa sulod nga armado.

Tinguha usab niini nga imbestigaran ang mga hulga nga iyang nadawat, lakip na usab ang kamatayon ni Atty. Green. Si Taliño sa iyang bahin nimando gilayon ug dinalian nga imbestigasyon batok sa mga police stations sa Bohol nga gireklamo ug kun masayran nga aduna kini kalapasan, kinahanglan kining mohatag sa ilang pagpasabot.

Dugang ni Taliño, adunay dinalian nga pakisusi sa reklamo ni Blomqvist ilabi na nga adunay mga hulga. Kun mapamatud-an kini, ilang irekomendar nga kinahanglan siya og security escort. (BANAT NEWS)