Tokanism!

Ingon niini ang paghulagway ni kanhi Presidente Fidel Ramos kang Presidente Rodrigo Duterte kinsa matud pa kutob lang sa estorya ug kulang sa buhat, ilabi na sa programa sa Duterte administration batok sa ilegal nga drugas. Sumala ni FVR nga ang mga utok nga nagpaluyo sa ilegal nga drugas, ug uban pa nga mga drug personality maoy giuna sa pagpuhag ang mga gagmay’ng tawo nga nalambigit.

Gihimo niyang sanglitanan ang mga nangamatay nga pulos mga taga eskwater o kadtong mga “bukot-bukot” nga mga drug user ug pusher.

May punto baya si Ramos kay kinsa man nga mga mastermind sa illegal drugs ang nangahay-ad gawas ni Albuera Mayor Rolando Espinosa?

Sa wala pa ang election, gabulabula na ang baba ni Digong sa iyang panaad nga sumpoon ang problema sa drugas sulod   lang sa unom ka bulan. Nahimo na lang siya nga presidente wala niya matuman ang iyang gipanganti bisan pa og “wala ug tuo” ang pagpatay sa mga gagmay’ng “isda” sa negosyo sa shabu.

Karon gipahunong niya ang kapolisan sa kampanya batok sa illegal drugs human niya mahibaw-i nga nalambigit ang mga polis sa tinonto.

Mahatagan kaha og katumanan ang iyang gipanaad? Mura’g imposible kun ang PDEA lang ang saligan kay limitado ang ilang manpower ug resources.

Gipanganti usab ni Digong nga limpyohan ang tanang ahensiya sa kagamhanan gikan sa mga kurakot nga opisyal ug kawani. Apan kutob lang gihapon sa iyang baba kay wala man siya makadisiplina sa iyang mga brod sa fraternity nga nalambigit sa kurapsyon sa Bureau of Immigration. 

Bitaw mura’g wala pa may violent reaction si Digong sa kritisismo ni FVR kinsa maoy nagkombinser niya nga modagan pagka presidente. Lisod ra ba ni si Duterte kun sawayon kay dili gyud mahitabo nga dili niya baslan sama sa simbahang katoliko nga ligoon niya pirme sa iyang pagpamalikas. Apan mas maayo nga mamati sab si Duterte sa obserbasyon sa ubang tawo kay dili man gyud siya perpekto.