Tinguhang pagtukod og skywalks buhion

CEBU, Philippines - Si Kongresista Raul Del Mar misaad nga hangyuon niya ang kadagkoan sa Department of Public Works and Highways (DPWH) aron nga makagahin kini og budget alang sa pagpatukod og mga skywalks ug flyovers dinhi sa Dakbayan sa Sugbo nga makaabag sa pagpamenos sa problema sa trapiko.

Matud ni Del Mar nga tungod kay wala na may Priority Development Assistance Fund (PDAF) ang mga magbabalaod, dili na siya basta-basta nga makapatukod og flyover ug skywalks, apan mohangyo na lang siya sa kadagkoan sa DPWH nga magahinan og pundo ang mga proyekto nga gusto niyang mugnaon dinhi sa dakbayan.

Ang mga flyover ug skywalk projects nga gitukod sa north district dinhi sa dakbayan pulos mga proyekto ni Del Mar kaniadto nga aduna pay PDAF ang mga magbabalaod.

Ang PDAF giwagtang tungod sa daghang mga anomaliya nga gihimo sa pipila ka senador ug mga kongresista nga mibulsa ra sa kuwarta.

Gusto kaniadto ni Del Mar nga kabutangan og flyover ang mga eskina diha sa Brgy Carreta ug laing flyover sa eskina Gorordo ug Archbishop Reyes Avenue apan wala mahinayon kay gibabagan ni kanhi mayor Michael Rama.

Gibabagan usab ni Rama ang tinguha kaniadto ni Mayor Tomas Osmeña dihang kongresista pa siya nga katukoran unta og flyover ang eskina Gorordo Avenue ug Sudlon Street sa Lahug.

Matud ni Del Mar nga dili gyud malalis nga ang pagbutang og flyover makasulbad gyud sa problema sa trapiko kay ang mga sakyanan dili na kaayo magpaabot og dugay nga makalahos sa eskina.

Si Osmeña mibutyag nga naninguha siya karon nga atol sa iyang termino mapatukod ang 16 ka flyover ug underpass aron makasulbad sa problema sa kahuot sa mga sakyanan. (BANAT NEWS)