Halin sa yuta sa SRP iuli ni Osmeña
CEBU, Philippines - Gitataw ni Mayor Tomas Osmeña nga kun ma-revoke na ang kontrata sa pagbaligya og 19 hektarya nga kayutaan sa South Road Properties ngadto sa Filinvest Land Inc., ang Dakbayan sa Sugbo mouli dayon sa gibayad sa kompaniya kay ang kuwarta wala gastoha sa siyudad.
Matud ni Osmeña nga wala gyud gastoha sa dakbayan ang kuwarta nga pasiunang gibayad sa mga investors nga nakapalit sa yuta nga gibaligya kaniadto atol sa administrasyon ni kanhi mayor Michael Rama.
Human sa pagpirmahay og kasabotan pagbaligya sa 19.2 hektareya nga kayutaan sa SRP, ang Filinvest mibayad dayon og P3.37 Bilyones ngadto sa dakbayan isip pasiunang bayad nga katunga sa kantidad sa yuta nga ilang gipalit.
Ang balanse nga kantidad impason sa anam-anam nga paagi sulod sa tulo ka tuig.
Apan si Tristan Las Marias, ang senior vice president sa Filinvest Land Inc. mipasabot nga wala makatuman ang kanhi administrasyon sa pipila ka lagda nga gilatid diha sa Terms and Condition sa pagbaligya.
Ang opisyal sa FLI miingon nga kay nakabayad na man unta ang FLI sa katunga sa kantidad sa yuta nga ilang napalit ang dakbayan angay na unta nga mohatag sa mga mahinungdanong dokumento, apil niini ang titulo sa yuta.
Si Osmeña miingon nga ang mga abogado sa dakbayan makigtam-bayayong sa mga abogado sa FLI aron mapadali ang pag-rescind kon pag-revoke sa kontrata sa pagbaligya. (BANAT NEWS)
- Latest
