Peace talks posibleng ituloy
MANILA, Philippines - Malaki ang posibilidad na ipagpatuloy ang usapang pangkapayapaan sa pagitan ng pamahalaan at ng CCP-NDF-NPA.
Ito ang inihayag ni Secretary Jesus Dureza ng Office of the Presidential Adviser on the Peace Process (OPAPP) sa kanyang pagdalo sa Kapihan sa Manila Café Adriatico sa Malate kahapon ng umaga.
Ayon kay Dureza, mismong si Pangulong Duterte ang nagsabi na maaring bawiin ang kanselasyon sa peace talks kung may makikitang malakas na dahilan o compelling reason upang muling humarap sa negosasyon ang panel ng gobyerno.
Hindi naman nilinaw ni Dureza ang sinasabing compelling reason ngunit kanyang sinabi na kung makakabuti sa interes ng mamamayang Filipino.
Aniya, hinihikayat niya ang sambayanan na antabayanan ang sasabihin ng Pangulo kung ano ang mga maituturing niyang compelling reasons.
Binigyang linaw niya na simula’t simula pa ay naging sinsero na ang administrasyong Duterte sa pagsuong ng kapayapaan sa mga leftist, kagaya ng deklarasyon ng unilateral ceasfire at ang pagpapatibay sa joint agreement on safety and immunity guarantee (JASIG) upang makaharap sa negotiating table ang mga kasapi ng CPP, NDF at NPA panel.
- Latest