Lider ng CPP/NPA sa MM, timbog

MANILA, Philippines -  Bumagsak sa pinagsa­nib na operatiba ng pulisya at militar ang isang mata-as na lider ng Communist Par­ty of the Philippines New People’s Army (CPP-NPA) sa operasyon sa Brgy. Sta Quiteria, Calo­o­­­can City, kamakalawa ng hapon.

Kinilala ni PNP Spokesman Senior Supt. Dionar­do Carlos ang nasakoteng suspect na si Ferdinand Castillo, Secretary ng Me-tro Manila Regional Party Committee.

Sinabi ni Carlos, alas-4:20 ng hapon nang masakote ng Criminal Investigation and Detection Group-National Capital Region at Intelligence Service Group (ISG) ng Philippine Army si Castillo sa nasabing lugar.

Ayon kay Carlos, bago ito ay isinailalim sa surveillance operations ang lugar matapos na makita rito ang presensya ng wanted na lider ng komunistang grupo.

Si Castillo ay dinakip ng mga awtoridad sa bisa ng warrant of arrest sa kasong double murder at multiple attempted murder.

Nakumpiska mula rito ang isang cal. 45 pistol na may limang bala at sari-saring mga identification card.

Kasalukuyan na nga-yong humihimas ng rehas na bakal ang suspek na sasam­pahan ng karagdagang kasong illegal pos-session of firearms.