Marquez tatanggihan ang $100M offer para labanan si Pacquiao

MANILA, Philippines – Maski na alukin ng $100 milyon ay hindi lalabanan ni Mexican world four-division world titlist Juan Manuel ‘El Dinamita’ Marquez si Filipino world eight-division champion Manny Pacquiao.

Ito ang inihayag kahapon ni Marquez sa pana-yam ng ESPN Deportes kaugnay sa sinasabing bi-nabalak na pag-imbita sa kanya ni Pacquiao para sa kanilang pang-limang pagtutuos sa Pilipinas.

May nagsabi kay Marquez na ilang investors at television networks ang handang maglatag ng $60 milyon para muli niyang labanan si Pacquiao.

“I am no longer interested in Pacquiao. They are saying that the networks are willing to pay $60 million dollars for a fight with Pacquiao in the Philippines,” sabi ni Marquez.

Pinatulog ni Marquez si Pacquiao sa huling segundo ng sixth round sa kanilang ikaapat na bakbakan noong 2012.

“I wouldn’t go to the Philippines for a fight with Pacquiao for a $100 million dollars,” dagdag pa ng Mexican legend.

Nakatakdang ipagtanggol ni Pacquiao ang kanyang hawak na World Boxing Organization welterweight crown laban kay Australian challenger Jeff Horn sa Abril.

Posible namang bumalik si Marquez sa training gym para sa pinakahuli niyang laban na maaaring kontra kay Puerto Rican star Miguel Angel Cotto.

“We are watching for opponents. This year is crucial for whether I will return or not. It depends on how I feel physically. I have trained, I’ve run, but it is not the same,” sabi ng Mexican.