Daga na nahuling nagnanakaw ng bigas, ‘ipinahiya’ sa China
ISANG daga na nahuli ng may-ari ng isang tindahan sa China na nagnanakaw ng bigas ang pinarusahan sa pamamagitan ng paggapos at “pagpapahiya” rito.
Itinali ng may-ari ng tindahan sa Heyuan City ang mga paa ng daga at sinabitan pa niya ito sa leeg ng maliit na karatulang nagsasabing hindi raw aamin ang daga sa kanyang pagnanakaw ng bigas kahit ito ay tortyurin pa.
Hindi pa nakuntento ang may-ari sa paglalaro sa daga dahil kinunan ulit niya ito ng litrato kung saan nag-iba na ang nakasulat sa maliit na karatula.
Sa mga sumunod na larawan ay mukhang pagod na ang daga at umaamin na ito sa kanyang pagnanakaw ng bigas base sa nakasulat sa karatulang nakasabit sa leeg nito. Nangako na rin itong hindi na uulit muli sa pagnanakaw, ayon sa nakasulat.
Marami ang nag-react sa China sa mga larawan ng daga. Inihalintulad ito sa naging karanasan ng mga Chinese noong panahon ni Mao Zedong kung kailan marami ang sinabitan ng karatula sa leeg upang ipahiya noong kasagsagan ng Cultural Revolution.
Wala namang nakaaalam kung buhay pa rin ang nahuling daga.
- Latest