Dayanara giatngan

CEBU, Philippines - Gikatahong  magbaha ang TV guestings ni Miss Universe 1993 Dayanara Torres sa pag-abot niya dinhi sa Pilipinas sunod  adlaw.   Motambong si Dayanara  sa 65th Miss Universe apan wala pa’y detalye kung unsa ang iyang espesyal nga partisipasyon niini.

Vin nag-independente

Nag-inusara nga  nagpuyo si Vin Abrenica sa iyang condo unit. Una nga gibutyag sa aktor nga ganahan siya makasuway nga mag-independente.   Malipayon si Vin sa dagan sa iyang career karon ubos sa pagdumala ni Noel Ferrer.

Bag-ong show

Aduna’y  umaabot nga  kiddie show si Ryan Agoncillo sa GMA-7  ug giingong aduna’y pasiunang negosasyon nga gihimo sa miaging adlaw kalabot sa maong proyekto..  Gikatahong ibutang kini sa  Sunday time slot. Naghinam-hinam na ang TV host sa  format sa maong show.

Dili bitter

Malipayon si  Zanjoe Marudo alang sa iyang ex-girlfriend  nga si  Bea Alonzo nga blooming kaayo karong panahona gumikan kang Gerald Anderson.  "Nakikita ko naman si Bea na happy siya ngayon, 'yun ang wish namin sa isa’t-isa. Okay kaming dalawa, wala kaming masamang tinapay,” suma pa ni Zanjoe.

Bag-ong awit ni Angeline

Malipayong   gianunsyo ni  Angeline Quinto  nga gi-release na ang iyang  new single  nga nag-ulohan og  "At Ang Hirap".  Gikanta niya kini sa programang "Magandang Buhay" kagahapon.   Si Yeng Constantino ang composer sa maong awit.

Ganahan mag-komedyante

Tsika pa ni Coleen Garcia nga pangandoy niya nga makabaton og  dugang  comedy projects karong tuiga . Matud pa ni Coleen nga relax kaayo ang maong  klase nga proyekto ug masukod pa gyud ang iyang abilidad isip aktres . Nasayran nga drama projects ang kasagaran nga nadawat ni Coleen sa miaging tuig.

Boobay balik-trabaho na

Nibalik na  sa trabaho ang komedyante nga si Boobay. Kahinumdoman nga nipahuway si Boobay og pipila ka buwan sa showbiz human kini na-stroke sa miaging tuig. Nilugwa na si Boobay sa programang Sunday Pinasaya sa GMA-7.

Wala magpaapekto

Wala magpaapekto  si  Maxine Medina  sa pangkantaw ni   Gloria Diaz  nga gamay ra kaayo ang  iyang tsansa nga maangkon ang “back to back win” sa Miss Universe.   Nagkaabot sila si Maxine ug Gloria sa dinner nga gi-host sa Okada Manila dili pa lang dugay  ug mapahiyomong nag-istoryahanay ang duha.

Ellen ug Baste nagbuwag!

Nitingog na gyud si Ellen Adarna sa real score nila sa presidential son nga si Sebastian "Baste" Duterte.

Duna’y Instagram follower ni Ellen nga nangutana sa aktres kung nganong wala na kaayo siya’y post sa mga hulagway nila ni Baste.

Aron matuldokan na ang mga isyu,  giangkon ni  Ellen nga  nagbuwag na sila ni Baste .

"Hindi na po kami. 2016 pa po yon. Bagong taon na. At para manahimik na tayong lahat," suma pa ni Ellen.

Kahinumdoman nga taod-taod na ang tsismis nga matud pa duna’y   relasyon ang duha   gumikan sa ilang sweet photos sa social media.

Bisan pa man sa maong taho , igo ra  mopahiyom ang duha  kung hisgotan ang maong topic.  (BANAT NEWS)