Lakers gilat-an sa Mavs
CEBU, Philippines - Labing makauulaw nga kapildihan sa kasaysayan sa ilang prangkisa ang naangkon sa Los Angeles Lakers human sila gilubong og 49 puntos sa Dallas Mavericks, 122-73 sa NBA kagahapon didto sa American Airlines Center sa Dallas, Texas.
Wala na’y duda asa pabor ang resulta sa duwa human ang Mavericks milansang og 34 puntos nga labaw sa halftime pa lang daan. Sa usa ka punto, ang Mavs naglabaw og 53 puntos timaan sa kompleto nilang dominasyon sa nagkagidlay nilang kaatbang.
Si Lakers coach Luke Watson wa’y gihatag nga pasumangil sa mapait nilang kaparotan nga alang kaniya naghatag og dakung kaulaw sa ilang koponan.
“We didn’t show up to play, honestly, which is frustrating,” matud pa ni Walton. “And honestly it’s embarrassing – for us as a team, for us as an organization, for our Lakers fans that are so good to us.”
Ang Mavericks nga nagbitbit na karon og 15-29 record, mipakgang sa duha ka sunod-sunod nilang pilde, samtang ang Lakers nahagsa ngadto sa 16-32.
Sa laing duwa, ang Golden State Warriors nakasugakod sa bugnaw niining sinugdanan dayon na ngadto sa pagsanta sa Orlando Magic sa iskor nga 118-98 alang sa ikapito nilang sagunson nga daog.
Si Stephen Curry milansang og pito ka tres sa iyang 27 puntos alang sa Warriors nga miinat sa labing nindot nga baraha sa liga ngadto sa 38-6.
Miposa siya og 16 puntos sa ikatulong kuwarter diin sila mitala sa kinadak-an nilang labaw nga 18 puntos.
Si Klay Thompson midugang og 21 puntos, samtang si Kevin Durant miamot og 15 puntos, 10 ka rebounds ug unom ka assists alang sa Warriors nga mikulit sa ika-20 nilang sunod-sunod nga daog sa higayon nga mopuntos sila og usa ka gatos o labaw pa.
Si Draymond Green adunay low-scoring game uban ang sayes puntos, apan milangkat siya og 10 ka rebounds.
Nangu sa Magic mao si Eldrid Payton uban sa iyang 23 puntos ug 10 ka assists, samtang sila si Bismack Biyombo, Nikola Vucenic ug Jeff Green mihimo sab og double figures nga adunay 12 puntos matag usa alang sa nasuhong nga Magic. (BANAT NEWS)
- Latest
