500 swimmers sasabak sa 107th PSL National Series

MANILA, Philippines - Mahigit 500 tankers ang magtatagisan sa 107th Philippine Swimming League (PSL) National Series na gaganapin sa Linggo sa Diliman Preparatory School swimming pool sa Quezon City.

Hahatiin ang torneo sa dalawang kategorya - ang Class A-B at ang Class C - kung saan nakalaan ang medalya sa Top 3 tankers sa bawat event habang gagawaran ng Most Outstanding Swimmer awards ang mga mangungunang swimmers sa bawat ka­tegorya.

Layunin din ng event na makapili ng mga mahuhusay na tankers na ipadadala sa mga international competitions na lalahukan ng PSL sa taong ito kabilang na ang prestihiyosong Indian Ocean All-Star Challenge sa Abril na gaganapin sa Perth, Australia.

“This is our first competition this year as we aim to pick some swimmers for our international competitions. It is open to all  regardless of your affil­iation as long as you want  to earn a spot in the team that we’ll be sending abroad,” pahayag ni PSL President Susan Papa.

Target ng PSL na muling magkaroon ng engrandeng kampanya sa taong ito kaya naman nais ni Papa na makapili na agad ng mga swimmers na hahasain para sa mga susunod na international competitions.

“Marami kaming natanggap na invitations to compete abroad kaya gusto naming makapili na ngayon pa lang ng mga swimmers na ipapadala namin. Kailangang masimulan na ang training nila,” wika ni Papa.

Ang mga mapipiling tankers ay sasailalim sa training camp na posibleng idaos sa Rizal Memorial Sports Complex na may Olympic-size swimming pool.

“So far, we already have a number of swimmers we picked based on their performances in the 2016 season. But we want to select more swimmers to give them a chance to represent our country in international level,” dagdag pa ni Papa.

Ilan sa mga tinututukan ng PSL ay sina Philippine national junior record holder Jerard Dominic Jacinto, reigning PSL Male Swimmer of the Year Sean Te­rence Zamora, NCAA me­dalist Sean Elijah Enero at Promising Swimmer of the Year candidate Marc Bryan Dula gayundin si multi-gold medalist Micaela Jasmine Mojdeh.