Dili mahinanok sa hagok (1)

Ang hagok, mao kana ang nagkurok nga kasaba sa pagginhawa kun makatulog na. Unya, kun may kadulog ka, mapuwerhisyo intawon nga dili mahinanok, saputon nga mura’g katak-opon sa baba aron dili na mosaba. Agoy kakuyaw, madayonan uroy nga dili na hinuon makaginhawa.

Bitaw dili lalim kining problema sa hagok, bisan og wa kay kadulog, kuyaw gihapon kay abnormal ang pagginhawa, simbako wa’y makapukaw unya nimo, usahay ra ba, masud-ipan nga maglisud sa pagginhawa. Busa atimanon nato kini, dili kita mokompiyansa nga himoon lang nga natural ang palahagok.

Ngano nga mohagok man kita? - gumikan kini sa kahago o kalapoy sa lawas, maapektahan nga mabara ang ilong ug tutonlan, nasirhan ang agianan sa hangin. Tungod niini, gipagamay sab nga nimenos ang suplay sa dugo ug ‘oxygen’, paingon sa utok (carotid atherosclerosis). Sakit kini nga naapektahan ang atong pagginhawa (respiratory track).

Wala kini kalainan sa sakit nga ‘sleep apnea’, nga makamatay ug sagad niini naglisud sa pagginhawa kun makatulog na. Hinuon wa pa kaayo’y mga paagi sa pagtambal niini, pulos lang pahupay pinaagi sa ‘nasal spray/drops’ nga duna’y mga sayd-epek. Hinuon mas bentaha magpatsek-ap sa espesyalista sama sa EENT o sa ‘somnologist’, aron matudloan ka unsa’y angay buhaton sa imong sitwasyon.

Gawas pa, naa na’y daghang gadyet nga pampaalibyo sa hagok. Apan epektibo kini kun tabangan ang kaugalingon nga menosan sa timbang ang lawas, pagtultol sa oras sa pagkatulog, magtakilid nga matulog, dili mamuwaw, dili magpalabi sa alkoholik ug labaw nga undangon gyud ang panigarilyo.