Sangguniang Senior Citizens

Atong pahinumdoman ang mga sakop sa bag-ong Kongreso, sa 17th Congress ba kini, sa mga laraw nga mahisakop sa mga local legislative bodies ang representante sa mga senior citizens. Sa ato pa, duna untay representasyon ang mga senior citizens sa mga provincial, city, municipal, ug barangay councils.

Nga kun dunay Sangguniang Kabataan, nganong wala may Sangguniang Katandaan? Atong hinumdoman nga si Rep. Arthur Yap sa Bohol mipasaka og balaudnon nga giulohan og Sangguniang Senior Citizens Act nga nag-amendar sa Local Government Code ug mag-create sa Sangguniang Senior Citizens (SSC), sama sa Sangguniang Kabataan (SK).

Matud ni Yap, ang kasaysayan naghulagway nga ang barangay system of government sa atong nasud, gimugna, ug nagsugod sa Council of Elders nga maoy nagtudlo ug naggiya sa mga batan-on pagpadagan sa kalihukan sa katilingban ug nga karon nahimo na nga mga lungsod, dakbayan ug mga lalawigan.

Dugang ni Yap: “This historical perspective is not unique to the Philippines. The Roman government, upon which most modern republican governments were molded, started with the creation of Roman Senate (ato ning makita sa mga salida sa sine – ams) coined from the term ‘SENATUS,’ meaning Council of Elders.”

So, ang kanhi gamhanan nga Roman Empire, gipadagan sa Council of Elders, nga karon maoy gibasehan ug gihimong modelo sa nagkalainlaing republican governments sa nagkalainlaing nasud sa kalibutan.

Hunahuna ni Yap, atong ibalik ang maong kadungganan ug recognition sa kaalam ug kasinatian sa mga senior citizens pinaagi sa ilang pagmiyembro sa mga local government legislative councils.  Sa iyang bahin, ato usab hinumdoman nga si Senador Loren Legarda, usa sa mga main authors sa RA 9994, mipasaka og susamang balaudnon sa Senado, ang Senate Bill 1418, nga ang mga senior citizens kahatagan or representasyon sa Sanggunian sa mga LGUs.

Nagkanayon si Legarda: “Our senior citizens deserve to enjoy a full and happy life. It is not enough that we make laws and policies for the elderly. What we must do is to allow them active participation in nation-building, particularly in policy-making and local legislation so that, they themselves can push for the institutionalization of programs that would address their special needs and concerns.”

Nindot kaayo. Kaya kaayo alang kanatong mga senior citizens. Kun ang mga bata (SK) makalingkod sa mga legislative  bodies sa local nga pangagamhanan, nganong dili man ang mga puno-sa-kasinatian nga mga senior citizens?

Hinaot nga kahatagan kini og pagtagad sa bag-ong pamunoan, ug sa “presumably reformed” nga mga sakop sa Kongreso.