Balaod militar

Atubangan sa mga sakop sa Davao Chamber of Commerce and Industry gipadayag ni Presidente Rodrigo Duterte nga puyde siyang modeklarar og balaod militar kun gikinahanglan sa iyang gubat batok sa gidiling drugas.

Kining maong pamahayag nakapabalaka sa mga Human Rights Advocates, ilabi na niadtong mga biktima sa balaod militar atol sa administrasyon ni kanhi Presidente Marcos. Apan ang atong Konstitusyon nagtugot kang Presidente Duterte nga makadeklarar og balaod militar kun gikinahanglan sa sitwasyon.

Ang pagdeklarar og balaod militar kabahin kini sa tulo ka gahum militar sa presidente sa nasud, nga mao kining mosunod: Ang gahum sa pagtawag sa militar ug kapolisan aron sumpoon ang kagubot (lawless violence), kun ang nasud gisulong sa iyang kontra nga nasud (invasion), adunay pag-alsa sa mga rebelde (rebellion), pagsuspenso sa pribilihiyo sa Writ of Habeas Corpus ug pagdeklarar og balaod militar kun seryoso ang sitwasyon.

Sigun sa Batakang Balaod, duha lang ang basehanan aron ang presidente makadeklarar og balaod militar, ug mao kining mosunod: Ang nasud gisulong sa iyang kontra nga nasud ug ang mga rebelde mihimo og pag-alsa batok sa gobiyerno.

Istrikto ang atong Konstitusyon sa balaod militar tungod kay ang presidente dili makadeklarar niini bisan anaa ang basehanan sa pagdeklarar og balaod militar kun ugaling wala kini kinahanglana alang sa kaluwasan sa publiko.

Busa dili kabalak-an ang gisulti sa presidente nga modeklarar siya og balaod militar kun gikinahanglan sa iyang kampanya batok sa gidiling drugas kay layo ra sa tinuod nga kini iyang himoon.

Ang presidente tambagan ra kini sa iyang mga sakop nga haniti ug eksperto sa balaod nga dili niya puyde nga madeklarar ang balaod militar base sa iyang hugot nga kampanya batok sa gidiling drugas kay dili man kini mao ang gilatid sa batakang balaod nga basehanan sa pagdeklarar og balaod militar.