Pusher gipusil sa ‘tigsumbong’
CEBU, Philippines - Patay ang usa ka lalaki nga tigpayuhot og ilegal nga drugas atol sa ilang pinusilay sa iyang silingan sa Sitio Telepono, Manipis, Dakbayan sa Talisay niadtong Martes sa hapon.
Ang biktima mao si Marvin Quillobe, 36, taga Lower Camp 8, Minglanilla, samtang ang suspek mao si Rhommel Secuya, 39, minyo nga taga Camp 7.
Si SPO3 Cecilio Miñoza sa Talisay City Police Station nibutyag nga gibaharan na daan sa biktima ang suspek nga patyon. Tungod sa pagpanagana sa suspek, niuli siya ug nikuha sa iyang armas.
Matud ni Miñoza nga nipalit og barbeque ang suspek dihang niabot ang biktima sakay sa iyang motorsiklo ug dayon bunot sa iyang armas ug gipusil ang suspek.
Giingong nikagar ang armas sa biktima hinungdan nga nakabunot sa iyang armas ang suspek dayon pusil.
Nahagba ang biktima samtang padayon nga nikablit sa iyang armas hangtud nga giusban na sab sa suspek sa pagpusil ug namatay.
Ang suspek dali nga nitahan sa iyang kaugalingon sa kapitan ug gi-turnover ngadto sa kapolisan ug gitanggong sa bilanggoan.
Si Secuya nga nahinabi sa Banat News nitataw nga nasuko niya ang biktima tungod kay nagduda kini nga siya ang nisumbong kaniya sa iyang ilegal nga kalihukan sa ilang lugar. (BANAT NEWS)
- Latest
