Kalihukan sa Miss U mas mopalambo sa turismo

CEBU, Philippines - Mapasigarbuhon si Lapu-Lapu City Mayor Paz Radaza sa malampusong pagpahigayon sa Swimsuit Presentation sa 86 ka mga kandidata sa Miss Universe 2017 niadtong Martes nga gihimo sa JPark Island Resort and Water Park nga nahimutang sa ilang dakbayan.

Bisan og bati ang panahon ug walay signal sa cellphone, malipayon gihapon si Mayor Radaza nga malipayon sab ang iyang mga konstituwente nga nakakita sa mga kandidata sa Miss Universe niadtong Martes.

Dugang niini nga epektibo ang pagpawong sa signal sa mga network bisan pa man sa mga negatibong reaksyon sa ubang tawo.

Alang sa mayor nga ang maong paagi mao ang sayon aron masiguro ang seguridad sa mga kandidata nga nibisita sa Sugbo alang sa nagkadaiyang kalihukan.

Samtang si Hembler Mendoza, ang pangulo sa Lapu-Lapu City Tourism Office, naglaum nga mas modaghan pa unya ang mobisita nga turista sa dakbayan human sa maong kalihukan.  Iyang gibutyag nga mapasalamaton ug malipayon ang Miss Universe Organization sa mainitong pagsugat sa mga Oponganon sa mga kandidata. (BANAT NEWS)