Mga sakyanan natumpagan

CEBU, Philippines - Napulo ka sakyanan, nga naglakip sa siyam ka passenger jeepney, usa ka awto ug usa ka motorsiklo, nangalumping ug nakaangkon og kadaot human natam-uki sa midahili nga mga bato ug lapok didto sa Sitio Garaje, sakop sa Barangay Busay kagahapon sa kaadlawon.

Swerte nga walay mga tawo nga nangatulog sa mga sakyanan mao nga walay kinabuhi nga nakalas. Sagad gyud nga ang mga konduktor sa maong mga sakyanan anha ra mangatulog, apan tungod sa grabeng katugnaw kaniadtong Martes sa gabii, wala sila didto mangatulog.

Maisip nga ang pagdahili sa yuta sa Sitio Garahe kagahapon maoy mitubag sa grabe sab nga landslide sa Sitio Tawagan sa Barangay Sirao nga nakaguba sa karsada sa maong dapit kaniadtong Lunes.

Si Nagiel Bañacia, disaster risk-reduction management officer sa dakbayan sa Sugbo, miingon nga ang kanunay’ng pag-uwan maoy nakapahumok sa yuta ug nakamugna og landslide. Mga PUJ nga ang ngalan “Salingsing” maoy sagad sa mga naguba kay natabunan. Ang usa niini awto ug usa ka motorsiklo.

Ang maong dapit adunay riprap apan wala kini makapiog sa mihumok na nga lapok sa ibabaw. Ang dapit nga nahitaboan nahimutang dili halayo sa Mountain View Park ug sa nabantog nga Temple of Leah.

Si Mayor Tomas Osmeña mipadala dayon og team gikan sa Cebu City Engineering Department ug City Disaster-Risk Reduction Management Office  alang sa clearing operation ug paghaw-as sa mga midahili nga bato ug lapok.

Adunay bahin sa maong dapit nga nakasinati og landslide apan wala usa tandoga sa disaster team kay may balay nga anaa sa ibabaw ug delikado nga basin og mahagbong. Ang tagbalay giawhag lang nga mohiklin.

Ang mga sakop sa Mines and Geosciences Bureau (MGB)-7 gipaabot nga mosusi usab sa maong dapit. Ang MGB nasayod na daan kun asa nga dapit ang peligro sa landslide ug mihatag na gani sila og hazard map sa dakbayan.

Samtang gibutyag ni Bañacia nga ang usa sa hinungdan sa pagdahili sa yuta sa ubang dapit sama didto sa Barangay Pit-os, Bacayan, Pulangbato, ug Budlaan mao ang nagpadayong pagpangubkob og bas ug graba sa kasapaan.

Matud ni Bañacia nga kining mga panghitabo karon masabot nga pasidaan na sa kinaiyahan nga kun magpadayon ang pag-abuso sa katawhan, moabot ang higayon nga daghan gyud ang mangamatay. (BANAT NEWS)