Epekto sa wa’y signal

Tungod sa gipatuman nga hugot nga seguridad, ang National Telecommunications Commission (NTC) mitugot sa hangyo sa kapolisan ug sa kagamhanan sa dakbayan sa Sugbo nga pawngon ang tanang signal sa mga telecommunication companies kaniadtong Sabado ug Domingo aron masiguro ang kaluwasan sa mga misaksi ug misalmot sa mga relihiyosong kalihukan nunot sa kapiyestahan ni Señor Santo Niño.

Tuod, nahuman ang dakong kalihukan nga malinawon ug luwas ang mga misaksi ug misalmot sa prosesyon sa kadagatan, sa solemne nga prosesyon sa kadalanan kaniadtong Sabado ug sa Sinulog Grand Parade kaniadtong Domingo. Salamat sa hugot nga seguridad nga gipatuman ug sa kooperasyon sa komunidad.

Tungod sa gipatuman nga hugot nga seguridad ug sa pagwagtang sa signal sa cellphones, nagmalampuson ang kapiyestahan ni Señor Santo Niño. Hinuon sa maong kalampusan, nagpahipi pud ang mga dili maayong kasinatian sa uban sama sa prosesyon sa kadagatan nga wala gayud masaksihi niadtong mga gusto nga mosaksi.

Kay nahimo na nga tradisyon sa pipila ka pamilya ang pagtan-aw sa prosesyon sa kadagatan, bisan og kusog ang ulan, nangadlawon gyud tawon sila pag-adto sa pantalan ug nagpaulan. Apan sa dako nilang kasagmuyo, wala gayud sila tuguti nga makasulod sa pantalan. Namauli ang mga tawo nga nagbagulbol.

Tungod kay wala na’y komunikasyon pagkahuman sa taas nga solemne nga prosesyon, ang mga sibyaanan ug mga simbahan na-busy sa pagpahibalo bahin sa mga bata ug mga tawo nga nabuwag sa ilang mga kauban.

Kay wala na’y komunikasyon, ang akong gi-order nga lechon sa Carcar nga ipahatod unta sa Domingo para sa akong mga bisita sa piyesta, gihatod na bisan og Sabado pa, mao nga wa nako dawata kay ang among sabot Domingo, ug dili Sabado.

Nasilsil na sa kaisipan sa mga tawo ang hulga sa bomba, tulo ang naangol ug may nawagtangan og cellphone dihang mibuto ang transformer sa VECO dapit sa Osmeña Boulevard nga maoy hinungdan sa pagkatibulaag sa mga tawo. Mao ni ang epekto sa wa’y signal ug hugot nga seguridad.