Mga gobernador ipatawag sa malacañang

CEBU, Philippines - Human sa mga mayor, ang mga gobernador na sab ang ipatawag ni Presidente Rodrigo Duterte sa Malacañang.

Ang Provincial Information Officer sa Kapitolyo, Jason Monteclar, nibutyag nga karong Huwebes paadtoon sa Malacañang ang mga gobernador.

Matud ni Monteclar nga ang maong tigum posibleng “monologue” diin ang Presidente lang ang mosulti ngadto sa mga gobernador.

Si Monteclar nibutyag nga usa sa report nga ilang nadawat nga posibleng ang Presidente mohangyo sa mga gobernador sa ilang suporta sa kampanya batok sa ilegal nga drugas sama sa hangyo ngadto sa mga mayor.

Gibutyag ni Monteclar nga excited si Gobernador Hilario Davide III tungod kay buot niining itaho ngadto sa Presidente ang hugtanong kampaniya sa probinsiya batok sa ginadiling drugas.

Matud ni Monteclar nga ipadayag ni Davide ang gihimo sa probinsiya nga pagsuporta sa administrasyon ni Duterte batok sa ginadiling drugas.

Sayo niini ang Cebu Provincial Police Office nideklara nga drug-cleared ang 81 ka barangay sa probinsiya.

Apan ang gobernador nimando sa Cebu Provincial Anti-Drug Abuse Office sa pag-validate sa maong deklarasyon.

Si Monteclar nagkanayon nga ang maong pagpahigayon og validation nagpakita kini nga ang probinsiya seryoso sa kampaniya batok sa ginadiling drugas. Gibutyag ni Monteclar nga ang maong isyu lakip usab unya nga ipadayag sa gobernador ngadto sa Presidente.

Giingong posible nga isulti usab sa Presidente ngadto sa mga gobernador kung kinsa kanila ang nalakip sa ulahing drug list.

Matud ni Monteclar nga seguradong ang pangalan sa gobernador dili apil sa maong drug list.

Gawas sa kampaniya sa ginadiling drugas posibleng ang gobernador mangayo usab og suporta sa Presidente sa katumanan sa katukuran sa trans-axial highway.

Si Monteclar nagkanayon nga buot sa gobernador nga mapatuman ang maong proyekto tungod kay gituohan kining maoy makasulbad sa kahuot sa trapiko sa kadalanan sa Sugbo. (BANAT NEWS)