Mga plano ni Mayor Gullas gipadayag sa konseho sa Talisay
CEBU, Philippines - Nihimo sa iyang report si Talisay City Mayor Eduardo Gullas sulod sa session hall sa konseho sa dakbayan kagahapon sa buntag. Ang report ni Gullas maoy nagsilbing pagpadayag sa iyang nahimo sulod sa pipila ka buwan nga sila nagsugod sa ilang administrasyon.
Gawas sa iyang mga proyekto nga nahimo na, iya sab nga gipasiatab nga iyang hangyuon ang iyang apo nga si Kongresista Gerald Anthony Gullas nga mopalabang og balaudnon nga himuong state college ang Talisay City College.
Siya nagkanayon nga kun kini mahitabo, magagikan na sa nasudnong gobiyerno ang pundo sa maong tunghaan ug kini makahatag na og libre nga pagtungha sa mga kabus nga kabataan.
Lakip niyang ihangyo sa iyang apo mao ang paghimo og balaudnon nga maghimo og kaugalingong water district aron mapahimuslan sa Talisaynon ang ilang tubig ug dili sa taga Metro Cebu Water District nga gibaligya sa laing lugar.
Ikatulo niyang ihangyo mao ang paghimo na unya sa Talisay City District Hospital nga Talisay Medical Center kay nagpabilin nga iya sa Department of Health ang kasamtangang tambalanan sa Talisay kay wala man kini na-turn-over ngadto sa Kapitolyo.
Tinguha mao ang paghatag og mas maayo pa nga serbisyo ngadto sa mga Talisaynon kun kini mahimo nang medical center ang maong tambalanan. Iya sab nga gipanglantawan nga maabot na unya ang ilang budget sa usa ka bilyon sa umaabot nga mga katuigan base sa naandan nga pagsaka niini.
Gipasalamatan sab ni Mayor Gullas ang iyang mga kaubanan sa konseho nga dali rang nipalabang sa gipangayong budget nga kapin sa P800 milyones.
Dugang niini nga ila na unyang magamit ang merkado sa Tabunok sa buwan sa Mayo.
Ang pagpanglimpyo sab sa Talisay maoy tutokan sa mayor ug edukahon ang katawhan sa pagpanglimpyo. (BANAT NEWS)
- Latest