Grupo sa mangungoot monitoron

CEBU, Philippines - Gimanduan na sa director sa Cebu City Police Office ang tanang station commanders ug ang hepe sa City Intelligence Branch nga monitoron ang mga grupo sa mga mangungo-ot nga lagmit mangbiktima sa mga bisita sa mga kalihukan sa Fiesta Senyor ug sa Sinulog Grand Parade.

Matud ni PSSupt. Joel Doria nga usa sa ilang gipagawas nga kamanduan nga subayon sa mga police station chief ang mga lodging house nga anaa sa ilang dapit kun kinsa ang mipuyo ug asa kini gikan.

Hinoon hangtod karon si Doria miingon nga wala pa sila’y nadawat nga impormasyon sa bisan unsa nga grupo sa mga balhiboon og kamot nga ania sa dakbayan.

Ang maong pagpangandam sa kapolisan gihimo subay sa nahitabo sa nakalabay nga tuig diin adunay nasikop nga mga grupo sa mga mangungoot ang nasikop dinhi sa Sugbo nga nagagikan pa sa kasaulogan sa Black Nazarene didto sa Manila.

Apan usa sa giproblemahan karon ni Doria mao ang kahimtang sa panahon, mao nga lakip sa iyang mando ngadto sa iyang mga sakop nga magdala na daan og rain coat kay dili man gyud niya pabiyaon sa puwesto ang matag polis kun asa sila madestino sa pagbantay. (BANAT NEWS)