EDITORYAL - Anti-bomb joke law

Ang mangomedya nga adunay bomba diha sa publikong mga dapit mapriso gyud. Mao kini ang pasidaan sa mga otoridad batok niadtong mga tawo nga wa’y lingaw sa kinabuhi, kun dili, ang pagtisok ra gyud og kasamok.

Karong panahona, dili kini maayo nga komedya kay daghan na ang nangamatay ug nangaangol tungod sa pagpamomba. Dili maayong himoong komedya ang kasakit sa uban, kun walay mahimo sa kinabuhi kining ubang tawo. Ang Presidential Decree No. 1727 o Anti-Bomb Joke Law, usa ka balaod nga para lang gyud sa mga komedyante o mga tawo nga wa’y lingaw sa ilang kinabuhi.

Panahon pa kini sa Martial Law nga gipasar sa kanhi diktador Ferdinand Marcos, dihang ang Pilipinas nag-atubang og daghang hulga kaniadto. Alang sa kasayuran sa tanan, ang madakpan nga nakalapas niini nga balaod, kaniadto ug hangtod karon, dili makapiyansa alang sa temporaryong kagawasan.

Magpaabot gyud sila nga mahukman sa korte kun nakalapas ba sila sa anti-bomb joke law. Dili madawat sa korte ang rason nga nangomedya ra, kay sumala pa sa maong balaod bisan ang pagkomedya nga adunay bomba kalapasan na. Lisud kaayo kining depensahan ngadto sa korte kay kinahanglang pamatud-an sa akusado nga wala gyud kini mohimo’g pangomedya bahin sa bomba diha sa publiko.

Kadtong gahi gyud og ulo ug mapamatud-ang sad-an, mapriso og lima ka tuig ug pamultahon og P40 mil. Dili malalim ang panahon nga mausik kun makombikto.

Wala pa’y terorista nga sama karon kaniadtong panahon pagmugna sa balaod. Politika maoy rason kaniadto sa mga walhon ug separatistang mga Muslim sa ilang pagpangatake sa mga target nga sibilyan.

Apan karon, ang terorismo walay political nga isyu nga nalambigit, puro pagpanghadlok, paglisang sa katawhan ug pagpatay kutob sa mahimo, sibilyan man o militar ang target, wa’y gipili. Karong taliabot ang labing dako nga selebrasyon dinhi sa Central Visayas nga mao ang Sinulog, puwerte na ang pagpangandam sa kapolisan ug militar kabahin sa seguridad.