Danyos sa sunog P1M

CEBU, Philippines – Mikabat sa usa ka milyon ka pesos ang danyos sa sunog nga miulbo pasado ala-una niadtong nakalabay nga kaadlawon diha sa Brgy. Tangil sa Lungsod sa Dumanjug.

Sa imbestigasyon sa kabomberohan sa Dumanjug nasayran nga nagsugod ang sunog sa usa ka sari-sari store sa maong dapit ug mikatap sa silingan nga mga balay ug establisemento.

Ang sunog nahitabo mga 30 metros lang ang gilay-on gikan sa Dumanjug Police Station.

Atol sa maong hitabo naglisod og tabang ang mga kabomberohan sa maong sunog human wala mogana ang fire hydrant sa maong dapit hinungdan nga ilang gisaka sa ika-tulo nga alarma.

Gumikan kay halos hinimo sa mga light materials ang mga balay sa maong dapit dali sab kaayo nga midako ang sunog.

Ala 1:44 sa kaadlawon nadawat sa kabomberohan ang alarma ug pipila ka minutos ang milabay ang mga fire truck nga nagagikan sa lungsod sa Moalboal, Barili, Badian, Alcantara, Aloguinsan ug Dakbayan sa Carcar ang nakatabang sab sa pagpalong sa kalayo.

Atol sa maong sunog usa ka sakop sa Bureau of Fire nga si Fire Officer 1 Dexter Datulayta ang nakaangkon og paso sa iyang paa atol sa pagkumbati sa pagpalong sa kalayo.

Hingpit nga napalong ang sunog alas 4:33 sa kaadlawon.

Sa pagsubay sa kabomberohan miabot sa napulo ka mga establisemento o balay ang naugdaw nga miabot og usa ka milyon ka pesos ang danyos.

Padayon ang pagsubay sa kabomberohan sa hinungdan sa maong sunog. - /EIM) (BANAT NEWS)