Dili ka ehersisyo unsay remedyo (1)

Gikinahanglan gayud ang pag-ehersisyo, ilabi na kun makamatikod na kita og kaluyahon o kakapoy sa panglawas. Ang kanunay nga pag-ehersisyo makapahimsog sa lawas. Unsa may mga gipamati karon, kalagmitan kulang kita sa paugnat sa kaunoran ug sa kaugatan, aron sa pag-epekto nga mohimsog ang mga sistema sa lawas.

Gihimo kita nga tawo, dili usa ka poste o estatuwa nga gipabarug nga mo-posing sa atong maayong pagkatawo. Matud sa Dios, palihukon kita aron mabuhi, busa aron kita husto nga makalihok ning kinabuhia, dili ta makalikay sa ehersisyo aron kusgan kita nga molahutay sa unsa man ang atong buhaton.

Ang uban dili nato mabasol sa kaapike sa higayon sa pagpaningkamot nga mabuhi ning modernong panahon sa pakigbisog. Apan kun dili gyud kita maka-ehersisyo, adunay mga remedyo nga buhaton nga sama ra ikaw og nag-ehersisyo samtang gihimo nimo ang inadlaw nga kaakohan. Sama niini:

* Kun paingon ka sa imong destinasyon, sa trabaho ug sa uban pa nimong padulngan, maglakaw lang kun duol ra (1/2km), kun may gilay-on nga makalakaw ka, mosayo nga untop moabot sa dapit. Maayo ni kay sa matrapik nga mapug-ok sa sakyanan, unya naka-ehersisyo ka pa.

* Kun tua kana sa opisina, ayaw pag-elevator, maoy gamita ang hagdanan. Igo na ang maghagdan kutob sa ika-4 nga andana. Kun pataas pa, pwede na mag-elevator. Apan dili mosulod dayon kun aircon ang opisina, mopahuway una og 5-10 minutos aron mokalma ang presyon sa dugo ug dili ka panuhuton o pamaolan. Mao sab kini ang buhaton kun mopauli na paingon sa balay.