Amahan sa scholar nga gipatay nidangop sa NBI

CEBU, Philippines - Nidangop sa National Bureau of Investigation ang amahan sa babaye nga gipatay ug gilabay sa Lungsod sa Sibonga sa niaging semana.

Si Joselito Jabello, taga Brgy. Danas, Consolacion, wala nakontento sa imbestigasyon sa kapolisan sa Lungsod sa Sibonga sa kamatayon sa iyang anak nga si Jenivieve Jabello.

Ang amahan buot masayud kung nganong gipusil ang iyang anak sa dughan ug sa ulo apan wala makit-i ang kabhang sa bala sa crime scene.

"Daku akong duda nga planado gyud ang pagtrabaho," matud ni Jabello.

Hangtud karon wala pa masayri kung kinsa ang responsable sa krimen.

Wala sad siyay gidudahan nga kaaway sa iyang anak sanglit matud niya nga dili kini molakaw o molaag.

Si Jenivieve, 21-anyos, usa ka scholar nga nikuha og Animal Science sa Cebu Technological University sa Lungsod sa Argao diin siya nag-abang.

Sabado sa hapon nakit-an pa kini sa iyang boardmate nga naglakaw gawas sa ilang giabangan apan nakit-an na lang ang patay nga lawas niini sa bukirang dapit sa Brgy. Guimbangco-an sa Sibonga niadtong Lunes, petsa 21 sa Nobiyembre. (BANAT NEWS)