Bebot binoga sa pisngi, dedo
MANILA, Philippines – Patay ang isang babae matapos barilin sa pisngi ng hindi pa kilalang salarin, sa Port Area, Maynila kamakalawa ng gabi.
Sa pamamagitan ng barangay identification card na inisyu ng Brgy. 121 Zone 9 District 1, Tondo, Maynila nakilala ang biktima na si Julie Anne Sebastian, residente ng no. 401 B. Interior 37, Perla St., Tondo, Maynila.
Sa ulat ni PO2 Charles Licyayo ng Manila Police District-Homicide Section, dakong alas-9:37 ng gabi nang maganap ang insidente sa 12th St., Brgy. 650, Zone 68, Port Area, Maynila .
Ayon kay Rodolfo Trono, 70, Barangay Ex-O at residente ng lugar, nakarinig lang siya ng putok at nang alamin ay nakita na lamang na nakabulagta ang babae na may dugo sa mukha.
Hindi naman makapagbigay ng anumang impormasyon ang mga residente dahil na rin sa takot.
Wala rin umanong closed circuit television (CCTV) na nakakabit sa erya ng pinangyarihan kaya malabo pang matukoy kung sino ang namaril.
- Latest