Lomachenko, Walters magbinukbukay na alang sa world junior lightweight title

CEBU, Philippines - Eksplosibong binukbukay ang masaksihan sa mga disipolo sa boksing lukop kalibotan gumikan kay si Vasyl Lomachenko makighilam-usay  na og kumo ni Nicholas Walters alang sa world junior lightweight title karong adlawa didto sa The Cosmopolitan Hotel sa Las Vegas.

Si Lomachenko nga No. 7 pound for pound sa prestihiyosong The RING ug ang kasamtangang WBO champion, usa sa mga gitamod nga labing masidlakon nga bitoon karon sa boksidor.

Bisan og kapito pa lamang siya makaaway isip pro diin siya nagbitbit og 6-1 record uban 4KOs, si Lomachenko mihimo dayon og pangan sa iyang kaugalingon gumikan kay nakampiyon man dayon siya sa duha ka managlahing dibisyon. Gani nahimo siyang world featherweight champion sa ikaduha pa lamang niyang away.

Sa katapusan niyang pagkatkat sa ring, iyang gipakamang si Roman Martinez sa ikalimang hugna aron pagsakmit sa WBO super featherweight title niadtong Hunyo 11.

Dili hinuon angayan nga mokompiyansa si Lomachenko gumikan kay dekalibre sab ang kontra niyang si Walters (26-0, 21KOs). Ang wa’y pildeng si Walters labing mahinumduman sa mga Pinoy human sa makalisang niining pagpakatug ni Nonito Donaire aron pagdaog sa WBA featherweight title niadtong Oktubre 2014. Apan sukad niadto, kaduha pa lamang siya makaaway diin ang katapusan nagtabla sila ni Jason Sosa niadtong Disyembre. (BANAT NEWS)