Barangay kagawad, 4 pa pinabulagta ng tandem
MANILA, Philippines – Lima katao kabilang ang isang barangay kagawad ang pinagbabaril hanggang sa mapatay ng hindi pa nakikilalang mga suspect na riding in tandem habang dalawa ang sugatan nang tamaan ng ligaw na bala sa magkakahiwalay na insidenteng naganap sa Las Piñas, Taguig at Pasay City, kamakalawa ng gabi.
Ayon sa report na natanggap ni Police Chief Supt. Tomas Apolinario, district director ng Southern Police District (SPD), kinilala ang mga biktimang sina Honorato Navarro Jr., 54; Nadja Dumanin, 39 at Vincent Manaluz, na kaagad na nasawi sanhi ng mga tama ng bala sa ibat-ibang bahagi ng katawan buhat sa hindi pa batid na kalibre ng baril.
Nabatid, na alas-4:00 ng hapon nang pagbabarilin si Navarro ng tandem sa Brgy. Daniel Fajardo, Las Piñas City.
Alas-6:00 naman ng gabi nang pagbabarilin hanggang sa patayin ang mag-live-in partner na Dumanin at Manaluz ng riding in tandem suspect sa pag-aari nilang karendirya sa Brgy. Talon 5, Las Piñas City.
Sugatan naman ang kanilang staff na si Ester Doctolero, 37 na tinamaan ng ligaw na bala.
Ayon sa Las Piñas City Police, minsan ng sumuko sa ‘Oplan Tokhang’ ang mga biktima.
Sa Taguig City, ang barangay kagawad na si Julius Ceasar Buenaflor, 45, ay pinagbabaril din ng dalawang tandem alas-6:00 ng gabi sa kahabaan ng Tomasa Avenue, Brgy. Ususan, Taguig City.
Dead on arrival sa Taguig Medical Center ang biktimang si Buenaflor sanhi ng ilang tama ng bala sa ibat-ibang bahagi ng katawan buhat sa hindi pa batid na kalibre ng baril.
Dead-on-the-spot naman ang barker na si alyas Victor, 30-anyos matapos itong pagbabarilin din ng tatlong kalalakihang magkakaangkas sa motorsiklong walang plaka alas-11:30 ng gabi sa panulukan ng M. Roxas St., at Quirino Avenue, Brgy. Baclaran, Parañaque City.
Ginagamot naman sa Pasay City General Hospital (PCGH) ang tinamaan ng ligaw na bala na si Jomel Ansano, 24, nakatira sa Saint Andrew St., Brgy. 179 Maricaban Pasay City.
- Latest
