Duha patay tungod sa drugas

CEBU, Philippines - Duha ka tawo ang patay sa managlahing insidente sa pagpamusil diin ang usa kanila napatay atol sa police operation dinhi sa Sugbo nga niresulta usab sa pagkasakmit sa mga illegal nga drugas.

Diha sa Brgy. Alegria sa Lungsod sa Cordova, napatay sa kapolisan si Marlo Miano, 32, human kini gikatahong nisukol sa mga operatiba nga mosikop unta kaniya tungod sa pagpamaligya og illegal nga drugas.

Matud ni Police Senior Inspector Jomar Medil, hepe sa Cordova Police Station nga si Miano misukol apan naunhan sa mga polis.

Sumala pa nga si Miano, bag-ohay lang nisulod sa negosyo sa illegal nga drugas apan gikonsiderar na siyang high-value target tungod sa gidaghanon sa madispatsar niyang shabu.

Nakumpiska sa pulis gikan kaniya ang usa ka kalibre .45 pistola nga dunay duha ka bala, usa ka medium pack ug laing 29 ka gamay’ng paketeng gidudahang shabu. Ang shabu nga nasakmit gibana-banang mokantidad og P69,850.

Narekober usab sa kapolisan ang usa ka nikagar nga bala ug P500 buy-bust money.

Didto sa Sitio Bandilaan West, Brgy. Bagay, sa Lungsod sa Daanbantayan gipusil patay ang Number 4 sa listahan sa drug watchlist sa lungsod nga giilang si Carl Dagatan.

Si Dagatan kinsa nagpuyo sa Proper Bagay, Daanbantayan gipusil sa wala mailhing mga lalaki nga nagsakay og motorsiklo.

Ang biktima naigo sa iyang ulo ug ubang bahin sa kalawasan ug gisuwayan pa unta sa pagdala diha sa tambalanan apan nakabsan gyud kini sa kinabuhi.

Ang kapolisan padayon pa nga nagsubay sa motibo ug sa pag-ila sa pagkatawo sa mga mamumuno sa biktima.

Samtang didto sa Dakbayan sa Lapu-Lapu silang Ronnie Gesulga, 46, ug Arnulf Tuadles, 37, diha sa Purok Kawayanan, Brgy. Gun-ob.

Matud ni Police Chief Inspector Mark Gifter Sucalit, hepe sa Lapu-Lapu City Police Office nga si Tuadles residente sa D.M Dimataga Street, Brgy. Poblacion usa ka drug surrenderer sa Gun-ob Police Station 3.

Nakuha gikan kang Gesulga ang usa ka gamay’ng pakete ug medium pack nga gituohang shabu, usa ka canister ug P800 nga gituohang halin sa ginadiling drugas. Nabalik usab og kuha sa kapolisan ang P500 buy-bust money gikan ni Gesulga.

Samtang laing 14 ka gagmay’ng pakete sa shabu ang nakuha gikan ni Tuadles. Anaa sa P76,700 ang gibana-banang kantidad sa shabu.

Duha managkapuyo ang nasikop sa kapulisan sa Dakbayan sa Talisay human sa buy-bust operation diha sa Brgy. Tanke niadtong Sabado sa hapon.

Unang operasyon sa mga otoridad mga alas 12 nadakpan si Joamarie Napallas alyas Jomar, 23, kinsa giingong nitahan na sa Oplan Tukhang kaniadto apan nibalik sa pagpamaligya og drugas.

Si Napallas gikwelyuhan human nibaligya og shabu sa police poseur buyer ug nakuhaan kini og 31 ka gagmay nga paketeng shabu, usa ka kalibre.45 pistola nga adunay upat ka bala.

Nalakip sa pagkasikop ang iyang kapuyo nga si Janet Relampagos, 31, tungod sa nakuhang unom ka gagmay nga paketeng shabu gikan kaniya.

Mga alas 5 sa hapon nadakpan usab sa laing operasyon si Edgar Daan, 50, ug nakuhaan kini og 13 ka gagmay nga paketeng shabu. Samtang ang iyang kapuyo nga si Happy Jean Donan, 25, giapil pagsikop human makuhaan og drug paraphernalia uban sa iyang amiga nga si Gladeline Campo, 25, dalaga nga taga Brgy. Tabunok. Report gikan sa The Freeman (BANAT NEWS)