SMBeermen pinulutan ang Hotshots sa opener
MANILA, Philippines – Kaagad kinuha ng nagdedepensang San Miguel ang kanilang unang panalo sa 2016-2017 PBA Philippine Cup matapos talunin ang Star, 96-88, kagabi sa Smart Araneta Coliseum.
Sinamantala ng Beermen ang tatlong krusyal na turnovers nina Mark Baroca at Paul Lee sa dulo ng final canto para gibain ang Hotshots.
Tumapos si ‘three-peat’ PBA MVP June Mar Fajardo na may 25 points kasunod ang 22 ni Alex Cabagnot at 17 si Arwind Santos para sa San Miguel.
Samantala, nakatakdang lumaban ang Barangay Ginebra sa Linggo sa pagsagupa sa TNT Katropang Texters sa Big Dome.
Nagmula ang Ginebra sa paghahari sa nakaraang PBA Governor’s Cup laban sa Meralco, habang ipaparada ng TNT Katropa ang bagong coach na si Nash Racela, pumalit kay Jong Uichico.
Inaasahan namang dudumugin ang bakbakan ng Gin Kings at Hotshots sa Araw ng Pasko kung saan itatampok ng Star si combo guard Paul Lee, nakapalitan ni two-time PBA Most Valuable Player James Yap sa Rain or Shine.
Ayon kay Yap, hindi siya maglalaro sa unang dalawang asignatura ng Elasto Painters, hahawakan ni Caloy Garcia matapos lumipat si Yeng Guiao sa NLEX, matapos ang arthroscopic surgery sa kanya sa off-season.
“Nagpapalakas pa tayo and nagpapakondisyon,” sabi ni Yap.
Magkukrus ang landas ng Rain or Shine at Ginebra sa Disyembre 4 sa Mall of Asia Arena.
Ang inisyal na regular twinbill ng season ay sa Miyerkules sa Big Dome kung saan magtatagpo ang Blackwater at Phoenix Petroleum sa alas-4:15 ng hapon.
- Latest