Valdez, Gumabao rivalry muling iinit sa V-League, Spikers’ Turf All-Star Game

MANILA, Philippines – Matinding pukpukan ang masisilayan tampok ang pinakamahuhusay na manlalaro sa Shakey’s V-League at Spikers’ Turf sa paglarga ng All-Star Game ngayong araw sa Philsports Arena sa Pasig City.

Papalo ang V-League All-Star sa alas-5:15 ng hapon kung saan maghaharap ang Team 1 at Team 2.

Hahataw para sa Team 2 sina Michele Gumabao, Myla Pablo, Gyzelle Sy at libero Melissa Gohing na umaasang madadala ang suwerte sa kanilang koponan matapos pamunuan ang Pocari Sweat sa kampeonato sa katatapos na Reinforced Conference.

Sasabak din sina Jia Morado ng Ateneo; Diana Carlos, Marianne Buitre at Isa Molde ng University of the Philippines; Cherry Rondina at Ria Meneses ng University of Santo Tomas; Amy Ahomiro ng BaliPure at Toni Basas ng Far Eastern University.

Mamanduhan ang tropa nina coaches Rommel Abella ng Pocari, Jerry Yee ng UP at Kungfu Reyes ng UST.

Mabangis din ang Team 1 na pangungunahan ni reigning V-League MVP at three-time UAAP MVP Alyssa Valdez ng Bureau of Customs.

Muling makakasama ni Valdez sina Dzi Gervacio at Denden Lazaro na dati nitong kasamahan sa BaliPure at Ateneo Lady Eagles habang papalo rin sina Jessica Galanza at Wenneth Eulalio ng Laoag; Jocemer Tapic at Wendy Semana ng Air Force; EJ Laure ng UST; Fenela Emnas ng Customs; Nicole Tiamzon ng UP; Remy Palma ng FEU at Elaine Kasilag ng Pocari.

Magsisilbing coaches sina Laoag mentor Nes Pamilar, Jasper Jimenez ng Air Force at Sherwin Meneses ng Customs.

Sa Spikers’  Turf All-Star, maghaharap ang Team 1 na binubuo nina Jessie Lopez, Louie Chavez, Reyson Fuentes, Jeffrey Malabanan, Mark Alfafara, Ismail Fauzi, Bryan Bagunas, Edward Ybanez, Vince Mangulabnan, Berlin Paglinawan, Patrick Rojas at Kheeno Franco.

Aariba para sa Team 2 sina UAAP MVP Marck Espejo, Ish Polvorosa at Rex Intal gayundin sina Raymark Woo, Geuel Asia, Ysay Marasigan, Peter Torres, Howard Mojica, Rodolfo Labrador, Greg Dolor, Alfred Valbuena at Jason Uy.