Laban sa anti-Marcos protesters:Full force ng batas ikakasa
MANILA, Philippines – Ipatutupad ng National Capital Region Police Office ang ‘full force’ ng batas laban sa mga magsasagawa ng anti-Marcos rally sa Metro Manila kapag naging bayolente ang mga ito.
Ito ang babala kahapon ni NCRPO Director P/Chief Supt. Oscar Albayalde sa gitna na rin ng inilulunsad na kilos protesta ng mga anti-Marcos protesters habang may ikinakasa ring malawakang protesta sa darating na Nobyembre 25.
Ang hakbang ay matapos ang pa-sikretong paglilibing sa labi ni dating Pangulong Ferdinand E. Marcos sa Libingan Ng Mga Bayani (LNMB) sa Fort Bonifacio, Taguig City na natupad na kahilingan nito bago mamatay noong 1989 o may 27 taon na ang nakalilipas.
Nitong Biyernes ay nagsimulang dagsain ng mga pro at anti Marcos ang bisinidad ng LNMB at maging ang People’s Power Monument sa kahabaan ng EDSA Quezon City at nitong Sabado ay muli silang nagtipon sa lugar.
Kasabay nito, tiniyak naman ni Albayalde na ipatutupad ng NCRPO operatives ang maximum tolerance sa hanay ng anti-Marcos protesters.
Sa text message sa PNP reporters , sinabi ng NCRPO Director na sa ilalim ng Batas Pambansa 880 ay maaring magtakda ang mga alkalde ng mga pampublikong lugar tulad ng mga ‘freedom park’ para pagdausan ng demonstrasyon .
“Hindi itinuturing na freedom park ang EDSA People Power Monument at EDSA Shrine at hindi pinapayagan ang mga rally sa dalawang lugar na ito. Isang pribadong pag-aari ng simbahan ang EDSA Shrine na nagpahayag nang hindi pinapayagan ang mga rali at kilos-protesta rito,” paliwanag ni Albayalde.
Nilinaw naman ng NCRPO Director na maari lamang payagan ng mga pulis na magprotesta sa nasabing mga sagradong lugar kung gagawin ito nang mapayapa at maayos.
- Latest